Ka hukum ka DC ka Ri Bhoi ym man i katkam ka hukum ka NGT: TAMTT

Jowai: Ka seiñ The Association of Meghalaya Traders and Transporters (TAMTT) da thoh ko cha u montri rangbah ka jylla u Conrad Sangma yow pynsñiaw yei pyrchah ya ka hukum ka Deputy Commissioner ka Ri-bhoi Nongpoh kawa da pynmih ha ka 9 tarik uni u bnai.

Ka seiñ da ong ko wa i thmu ki bor district toh wow pynthut yei lai bait i khayi heiwa nadooh ka Supreme Court hadooh ka National Green Tribunal ym jooh em hukum ki na kawon ka sarok u lai, heiwon u pynhaap mooyong wei heiwon u dai ya u mooyong.

Wei ym-em leh ka hukum wow haap wow lai luti lyngba ka NH6 katkam wa phah ka Deputy Commissioner, Nongpoh.

Kamtæ ka seiñ da ong ko wa ya u mooyong wa da dep su waroh i jait cha ka sorkar chwa wow mih napoh ka jylla i kam yong ka sorkar toh wow sylli wa lada biang ki kot ki sla.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Ka seiñ da pyntip ko wa ka jylla Assam da em ko i thmu wow chna ya ka Smart City ha Beltola, kiwa khayi na Assam ym em thaw pynhaap namo thaw booh moo de ki ha Beltola wei ye wow kyrriah ya ini cha Meghalaya wei ka sorkar toh u chimkhia ko ya ini iwa daw pynyoh nong bha ya ka sorkar lada em ka yaaw mooyong ha Byrnihat wa Jorabat. Ka Assam da yoh myntoi bha ko nachwa neibhah ya u mooyong wa na Meghalaya da tip ya oo kam u mooyong Assam wei kani ka poisa da ki spah klur ym em poi ko cha ka jylla Meghalaya neibhah ya u mooyong da pynhaap ha Assam.

Katkam ka hukum ka DC ka Ri-bhoi da ong wa da chem wa da mih boon ki thaw pynlang mooyong (Coal Depot) ha ka thaaiñ Byrnihat-Jorabat kiwa da pynemkaam leh wow pynhiar wei wow dai mooyong chwa wow poi cha ka Integrated Checkgate wa em ha 2th Mile Shangbangla, Nongpoh (Exit Point).

Kamtæ ka bor District sñiaw ko wa ini i pynhaap ya u mooyong chiteiñ luti lyngba u sarok wa da jied NH6 man ko pyrchah ya ki kyndon ka NGT wei kini ki thaw pynhaap moo u kheiñ ya kiwa man pyrchah ya ka aiñ wei da khang wow em kam kini ki thaw pynhaap moo ha waroh ki thaaiñ ka Byrnihat-Jorabat.

Neiliang ka TAMTT won da ong ko wa ki thaw pynhaap mooyong toh kiwa em hadien ki thaw wa dadep su dep pynbiang ya waroh iwa emkaam ka sorkar wei da pynhaap ha Byrnihat wa Jorabat wei lada ki bor district sñiaw ki wa ym em man kini ki thaw kiwa biang wei daw ktah i ya ka rymaw, man i i kitkhlieh yong ki tre thaw wow chna da kiwa biang wei lada ini man i pyrchah ya ka aiñ waroh ki karkhana wa em ha Byrnihat wa Jorabat leh ki jooh hi wei haap ki wow khang wei kyrriah cha Assam yow bood ya ka hukum ka DC.

Ini toh katkam wa pyntip u Enrico Pasi u President ka seiñ.