Jowai : Katkam ka hukum wada e u Office u District Magistrate, ka Moulvi Bazaar (Revenue Branch) heiyatoh wa chah beh chnong ki Khasi, Pnar wa em ha Srimangal Subdivision, Moulvibazar District wada yoh copy u Wyrta da ong wa i chong i sah, i rep i riang ki Khasi, Pnar heini i thaw man i pyrchah ya ka aiñ.
Kani ka hukum toh hei ktien Bengali wei u Wyrta lyngba ki stat puræ yaka ktien Bengali da batai wa ka hukum toh ka Eviction Case No. 08/2015-2016 kawa em ka tarik Bengali 16/02/1423 næ iwa mut 30/5/2016 kawa em leh ka Memo No. 05.46.5800.051.100.03.15…340(
Ya kani ka kot da phah cha ar ngut kiwa kynthup ya u Janab Lutmon Pohlong, khon u (L) Lyton Khasia naka chnong Naha Aslom wa u Pherly Surong, khon u (L) Biang Khasia na Nahar Kailin uwa man leh kam u Waheh Chnong heini.
Ha kani ka chithi da kynnoh wa kini ki ar ngut da chong beaiñ weida rep pathi beaiñ ki ha i thaw wa em kam 150 Acre iwa man hapoh ka Nahar Tea Estate kawa da chim wai ya ini i thaw naka sorkar.
Wei katkam ka aiñ Government Land and Buildings Notification 1970 (Acquisition and Retrieval P/o 85/72 rule 5/1) da phah deiñ lut ya ki dieñ kwai/pathi wei wow mih noh ki na ini i thaw hapoh ka 12 Naiynru 2016.
Wei da maham leh yaki wa lada ym leh ki yeini u Senior Executive Magistrate chirup waki bor pulit daw wan deiñ lut ki ya ki deiñ wa waroh kiwa rep ki wei daw pynmih yaki neini deibor wei daw chimkti noh ka sorkar ki ini i thaw.
Ini i thaw da em i ha ka register i yeiwa da tip kam Mouja Cholita Chora JL No. 105, Khotiyan No. 1, Dag No. 1
Ya kani ka hukum da soi da u Prakash Kanti Choudhury uwa man kam u Additional District Magistrate (revenue), Moulvi Bazaar.
Katwa neilaing ki paidbah da kam ki wa da chong da sah wei da rep ki ha ini thaw da palat 75 snem wei da su ki leh cha ka sorkar Bangladesh ya kawa tip kam ka Union Tax yow pynemkaam ya ini i thaw.
Discussion about this post