Lada thooh thaw lai ke phi da iwa thymme iwa dang duna kiwa da lai, khamtam lada kwah phi wow lai ke cha ki thaw wa em kchaaid, ye phi wow sñiaw yaka kchaaid Umbyrleiñ kawa em ha chnong Rngad, East Jaiñtia Hills kawa dang ha uni u snem da pynkreh yaka wow pdiang ya kiwa lai uiñke suwari wei man sakhiat ko kawa thymme hadooh wa ka chnong leh ym pu em booh dor bai psiah cha ka wei da chim hi-eh katkam wa e sñiawbha kiwa wan cha kani ka thaw.
Ka kchaaid Umbyrleiñ toh kawa jngai du 36 Km na Jowai wei da chimpor ko hapoh chikynta chiteiñ hadooh wa poi ha i thaw wow booh kari wa em hajrong u loom wa em ka kchaaid. Da chimpor slem wow poi neidaw wa nadooh Pynthorsale dang pynchna ya u sarok hadooh ha Mutong wa jrong kamwa 6 Km uwa katni dang man sarok moo uwa jooh man sarok psiang nachwa.
Yow lai cha chnong Rngad hap yait naka NH-6 ha Kongong, u jooh u sarok wa lai cha ka kchaaid Moopun tangwa lada poi ki cha Moopun mut wa da palat phi yei thaw wow lai cha Rngad wa em i laad cha tidiang ha Mutong wei na Mutong hadooh wow poi cha i thaw pynsangeh kari da jngai sa 5.3 Km.
I thaw pynyieñ kari toh iwa madan thiaw tangwa ka sarok wow poi cha ini i thaw toh da i madan khyndaw. Ka thaw pynyieñ kari won toh kawa heh wa tymmoh da u phlang wa yirngam kawa da em leh ki moopynyieñ, ki mookynthai wei katkam wa pyntip u waheh chnong ka Rngad, nyngkong da chong chnong ha ini i thaw. Da pyntip u leh wa dang pyrkhat wow pynchna leh kam ka kynja Park ha kani ka thaw, ki thaw paitke wa i thaw chong lieñ na khlieh yong ka kchaaid tangwa yow poi cha i khlieh ka kchaaid ym pu em chna kamwa da chna wow hiar cha tre ka kchaaid.
Yow poi cha ka kchaaid hap wow lai kjat kamwa 15 minit tam wei ka kchaaid toh kawa hoi u hiar hadooh ha um wei da em leh iwi i bynta wa ym em yillu ka um wa ye ki bru wow ya kyndeh um, ka um man ko leh kawa jngiar.
I luti wow hiar cha ka kchaaid leh man i iwa suk ym toh iwa eh u lai, iwa khooid wei da chem leh yaki bru kiwa jied ya iwa noh roi ki bru.
Ka kchaaid hanla da ini i por tlang wa lai li pait ka, man hi ko kawa em um, ym em u stang lane duna um ko wei katkam wa pyntip ki tre chnong toh kawa em um waroh chi snem.
