Da: U Rev. Kyrsoi Pyrtuh
“La don katto kattne ngut ki nongap langbrot ha kata ka bynta jong ka ri kiba la sahmiet ha ki lum…U angel u la paw bad ong ha ki, nga don hangne lem bad ka khubor babha na ka bynta jong phi…Ha kane ka sngi ha ka shnong u Dabid la kha ia u nongpynim jong phi” (Lukas 2:8-10)
Ha kine ki ar tyli ki snem, kata ka snem 2020 bad 2021 ki la long ki por kiba eh ban pyrkhat shaphang ka jingkmen. Ka khlam covid19 ka la pynkordit bad pynsuhjer ia ka jingim bad kan dang shim por slem ba ngin khyllie pat ia ka jingim la ha ka liang ka їoh ka kot, ka їohkam їohjam, ka koit ka khiah, ka pule-dangle bad kumta ter ter.
Ha kajuh ka por pat ka mynsiem kam lah khlem da kyndeh haba ka aїom lehkmen ka la wan poi bad sa shisien pat da ka jingngeit bad ka jingkyrmen ngi їashim bynta lang ban rakhe ia ka Khristmas. Ka aїom Khristmas ka їai pynkynmaw ia ngi ba ka khubor babha bad ka jingkyrmen ka la wan hiar khyndew na bneng ha ka dur bad ka longrynїeng jong u Jisu Khrist.
Ka Khristmas ka dei ka aїom lehkmen bad ngi rakhe ia ka jingwan longbriew jong u nongpynim sha ka pyrthei. Ka Khristmas ka їai pynthymmai ia ka jingngeit bad ka jingkyrmen jong ngi ha ka hok bad ka jingshisha.
Ym lah ban len ba ka Khristmas kaba nyngkong ka khleh lang ka jingkmen, ka jingdukha mynsiem bad ka jingpisa jingmut. Ha ki khanatang shaphang ka Khristmas kaba nyngkong kiba ngi pule ha ki Gospel ngi shem ba ka jingkmen ka khleh lang bad ka jingdukha mynsiem bad ka jingpisa jingmut.
Ka Mary bad u Joseph, kiba long ka kmie bad u kpa jong U Jisu ki dei ki nongshong shnong jong ka Ri Palestine kaba shah synshar ha ki bor nongwei, kata ka Hima Rom. Ha ka por ba kha ia u Jisu, ki nongsynshar jong ka Ri Palestine ki khῆiot beiῆ ia ki nongshong shnong khamtam ia ki nongbylla sngi bad ki riewpaidbah da ki khajana kiba heh khnang ba ki lah ban pynbiang ia ki Kaisar ha Rom. Ka jingbamsap ka jyllei bad ka shyrkhei. Ki riewheh riewhaiñ tang ban bit ban biang їalade shimet ki pynїajan bad pynїadei bad ki Kaisar ha Rom bad kim salia lada ki riewpaidbah ki їap bad ki don hapdeng ka jingjynjar.
Ka Mary bad u Joseph ki leit sha Bethlehem ban leit ai burom shi sien shi snem ia kata ka Sorkar nongwei bad ka la nang pyndukha shuh shuh ia ka mynsiem jong ki namar ha Bethlehem kim don їing, kim don la ka jong ka khyndew ban shong ban sah bad ki long tang ki nongwei ha la ka jong ka Ri. Ka Mary bad u Joseph ki la hap ban sahmiet ha sem kulai bad hangta ka Mary ka la kha ia u Jisu.
Nangta shuh shuh ki khanatang ki їathuh ba u Angel U Blei u leit ban їathuh ia kane ka khubor babha ba la kha ia u Jisu Khrist ha ki nongaplangbrot kiba sahmiet ha lum. Ka khanatang shaphang ki nongap langbrot ha lum ka long kaba shoh mynsiem. Ki nongap langbrot kiba rit bad kiba poh ka kyrdan ha ka imlang sahlang ki їohsngew nyngkong eh ia ka khubor babha ba la kha ia u Jisu Khrist bad ki їoh ban їashim bynta lang ha kane ka khanatang. Ka khanatang jong u Lukas ka long kaba shai bad ka pynpaw ba ki riewpaidbah, ki riewmadan, ki duk ki suk bad baroh lang ki їohsngew ia kane ka khubor babha bad ki їoh ban їashim bynta pura ha kane ka pyrta kmen.
Ki khanatang shaphang ka Khristmas ki kynthup ruh ia ka hukum jong U Herod ban pynїap noh ia ki khyllung kiba hapoh ar (2) snem ka rta ha ka ka Ri Palestine. Ka jingphet rieh bad jingphet їap jong ka Mary, u Joseph bad u khunlung Jisu sha Ijipt ban laitim na kata ka hukum jong u Herod. Ki lai (3) ngut ki riewstad na Ri Mihngi kiba wan wad ia u khunlung Jisu ki їaid hapoh ka syrngiew jong ka jingїap haba ki sngap ia ka jingbthah jong u Herod, hynrei u Angel jong u Blei u kdew ia ki da kawei pat ka lynti.
Hoid u Jisu Khrist u wan long briew sha ka pyrthei ka bym thikna, ka pyrthei kaba dukha, kaba lynga bad kaba pisa mysiem. Ka pyrthei kaba їam, kaba lynῆiar bad kaba paitdohnud. Ki don bun ki briew ha kine ki sngi kiba їam namar ki jingpang kiba shyrkhei, ki paitdohnud namar ba ki duh noh ia ki baieid bathoiñ, ki lynῆiar namar ka jingduk, ka jingkyrduh bad ki jingjynjar kiba bun.
U Jisu u wan sha ka pyrthei ban pynbna ia ka khubor babha bad ban ai jingkyrmen- Ka jingkyrmen kaba u Jisu u ai kam dei kaba thala lane kaba suda. U Jisu u aiti ia ka jingim na ka bynta kiwei pat, u shah shitom bad u їap na ka bynta ki nongap langbrot, ki nongtong dohkha, ki nongkhrong, na ka bynta kiba pang ñiangthohlieh, na ka bynta ki riewpaidbah, ki nongtrei ki nongbylla, ki kynthei, ki khunswet bad na ka bynta jong phi bad jong nga. Na ki blei jong ka pyrthei te ngi їoh tang ka jingkyrmen kaba shu thaba bad kaba suda. Hynrei, ka Khristmas ka dei ka jingkyrmen kaba shisha bad kaba dap kyrhai, namarkata ka daw ngi donkam ia ka Khristmas.
U Jisu u ong, “Nga la wan khnang ban phin їoh ia ka jingim- ka jingim ha ka jingdap kyrhai jong ka”
Ka Khristmas bad snem thymmai ba dap kyrhai ia phi baroh. Amen.
