Ka Sengkhihlang dap ko da i mynsien iwa sñiawsih kthang hajrong i yap syndet u Wh. Smik Kurbah uwa man leh u Vice President yong ka Seinbah ki Nongshat Nongkhien ka Bri u Ynñiawtrep Ynñiaw Skum uwa da khlaad ha ka 17 tarik.
Ya u Wh. Smik Kurbah, ka Sengkhihlang ym ye de ko u mylliñ yei noh kyllooid mynisen uni u waheh cha ka Bri u Ynñiawtrep Ynñiawskum, wei khamtam ya ka Sengkhihlang hawa pyndep ya ki kam niam rukom heipor wa pynyeiñ ia ki moobynna sahnaam yong ki Lympung ka Sengkhihlang ha kylleiñ ka Bri u Ynñiawtrep Ynñiawskum.
I yap syndet yong u Wh. Smik Kurbah man ko i dooh wa khroo bha ya ka Sengkhihlang.
Ka Sengkhihlang booh ko yei kyrpaad kyrpon ya u Blai kynrad wa i mynsien ksiar yong oo u poisuk poisaiñ ko cha dwar u Blai yow yachem ya ki bei tymmen ki pa tymmen wa ya ki warim wajah we heijooh i por leh yow baam kwai u ha dwar u Blai.
Kamtæ ka khubor sñiawsih leh lai lang ko chi kiwa yalam ka Sengbah ki Nongshat Nongkhein ka Bri u Ynñiawtrep Ynñiawskum deilang chirup cha kiwa ha yung ha sem yong u Wh. Smik Kurbah, ki kur ki jait, ki khon ki kti wa kiwa emyatoh wa jan wa oo.
Kamtæ neiliang yong ka Sengkhihlang booh ki ya ka ngooh ha u Blai kynrad neibynta kiwa ha yung ha sem, ki khon ki kti wa kamjooh leh ya ki lok ki jor kiwa emyatoh wa oo, “E wa u Blai kynrad wow pyntngen u ya ki ha kam kini ki por wa ka yung ka sem yong oo em ko ha pyrdi i sñiawsih.”
Ya ka niam ka rukom wa khaddooh daw pyndep ha ka 19 tarik ha chnong Mawkohtep, East Khasi Hills District kawa man ka chnong tre yong u Wh. Smik Kurbah.
Kani toh ka katkam i pynlait khubor u S. Sari, Publicity Secretary Sengkhihlang.
