Ka Panaliar Women Welfare Organisation (PWWO) kawi na ki chnat krehkaam ka chnong Panaliar kawa da em ha ka ya kawi ka Committee kawa tip kam ka Mahila Arogya Samiti (MAS) kawa toh u pait ya i chait i khiah ki kynthai wa ki khynnah hapoh ka chnong. Hajrong ini da pynman ko ya ka pynsñiawthooh paidbah ha ka 26 tarik uni u bnai ha Yungwalieh ka chnong Panaliar hajrong ka phang “A healthy woman builds a healthy society” heiwa u waheh chnong ka Panaliar, u Riquoma RQ Laloo daman u kam uwa chah khut kyrpang.
Ya ka yalang tbian da pynlai da ka Chairperson ka PWWO heijooh i por man ko kam ka Chairperson ka MAS, ka Biangtre Bamon kawa da pynsñiaw yei sñiawngooh ya u waheh chnong uwa da smat bait u yarap wei wow e buit e bor ya ka seiñ kynthai hei wow tia ko chaphrang.
Da yoh ya i ngoohblai na ka Dayaki Myrphet kawa man kawi na ki dkhot, i klam pdiang warom na ka Suma Passah, Secretary PWWO wa i klam na ka E.R. Unita Pakma ka dkhot ka PWWO.
Ka Unita hei klam yong ka da ong ko wa toh u baam kat watoh donhi u baam, ham baam dei wow pynhun ya u thylliej, katwa u kpoh wan dei pisa lang-a. “Ini toh iwa jia bha ha kiwa boon ki bru, khlem da pyrkhat wa da saja ka kor hapoh doh yong i u tylliat, pynchitom ko pyn ya idæ.”
Da batai bniah ko ya i rukom im wa bha tam hei manbru khamtam ya ki kynthai toh deiwa leh ya ka Yoga. “I leh Yoga, pynkhooid ko yei pyrkhat pyrdaiñ ka kynthai yow ye u pyntoh pynbiang ya ka yung ka sem, ki khon ki nat kamjooh ya u kurim. ”Ong ko wa, lada ka kurim stat ko u pynbiang pyntoh ya ka yung khamtam ya u pa ki khon, pynman ko ya ka yung kawa chongsuk ha iwon iwon i bynta wei u pa ki khon leh manda yoo u kamtæ da jhan bait u yoh u poi cha yung, ym lai bakla de u”. Da kyntu ko ya waroh ki manbei, ki khyllood wot ki chynrang leh wow ya chimbynta ha ka e sikai Yoga wa pynman kani ka Committee man ka sngi Chohthat wa ka Bibar heipor 5 waje i step.
U Riquoma, da ong u wa ka jaitbru yong i toh kawa embhah tam, heiwa kiwa nachwa manchwa da pyrkhat jngai ki, deiwa kheiñkor ya ka kynthai. Katwa kiwi tawon ki jaitbru dang ini tip ki wa ka kynthai leh emkaam hi ko ha ka imlang ka sahlang. Da booh u yei kyntien da ki ktien pharæng wa ong “A world without women–is like an empty garden.” Da ong chooh chooh u wa ha i pathan da khut ya ka kynthai dei pyrtuid “Ka kchu ka siang”, pyn neitæ i pyrtuid da tip wa lym em ka kchu ka siang, tang u baam leh ym yoh. Heiyatoh won wa ka phang yong ka pynsñiawthooh paidbah da ong u wa i chait i khiah ym mut i toh du wym em kjut donhi, toh u man kiwa chait wa khiah hei pyrkhat pyrdaiñ, kiwa chait wa khiah hei pynlai pynwan ya ka yung ka sem. Kattæ se u ye u kyntu kynrong ya ka imlang sahlang, neibhah ka kynthai kawa stat u pynlai pynwan ya ka yung ka sem, stat ko leh deiwa chynna jngai kammon u rah ya ka imlang ka sahlang.
Da e u yei kyrkhu kyrdoh ya ka PWWO kamjooh ka MAS yoh ki u lai chakhmat ha ki kaam wabha yong ki neibynta wow pyndooh pyndam ya waroh i sih iwa em hapoh ka chnong ka thaw. Da pynkut u deiwa ong, “Lada ym em ka khon kynthai, i manjait leh ye u wiar; lada em ka kurim, ka pateiñ leh wymye u hiar; lada em won ka Bei, wa pun wakieñ wa diang ya i; ka pyrthai leh ym man ko kamwa man katni”.
Ya ki kyntien e khublei da yoh na ka Secretary ka Mahila Arogya Samiti Panaliar, kawa man ka ASHA ka chnong, ka Tiptre Bamon.
