I neiliang kiwa ha yung hasem yong u (L) Bud Chyrmang, Pamra Paithlu, East Jaiñtia Hills District, lyngba kani ka kyrwoh khubor da i mynsien wa sñiawkhian, pynsñiaw i yei sñiawngooh hadooh kattæ kattæ cha phi ki lok ki jor ki kha ki man, ki kur ki jait kiwa na jan wa na jngai, kiwa da phah yaka khubor sñiawlem næ pyntngen cha ka yung ka sem yong i lyngba ki Social Media kam ki WhatsApp, Facebook Page, SMS hajrong i khlaad noh u (L) Bud Chyrmang uwa man u Kñi Rangbah yong ka yung ka sem wa ka kur Chyrmang Pamra Paithlu haka 24 tarik uni u bnai.
I dap i dei mynsien sñiawngooh wei e khublei kyrpang i yaka Seiñ Raij Tuber, yaka Seiñ Kyntu Seiñ Raij 12-Dolloi, yaka Seiñ Khihlang, yaka Seiñ Kur Chyrmang Pyllun, Seiñ Kyrsu Kyntu Seiñ Raij East Jaiñtia, Seiñ Raij All Jannita Hills, yaki Seiñ Raij Chnong Pamra Paithlu, yaka Dorbar Chnong Pamra Paithlu wa ya ki Seiñ Raij Chnong waphær waphær hapoh Ri Loom Jaiñtia. I dap i leh yei sñiawngooh ya phi ki bru rangbah, manbei wa kiwa yahkhmat yong ki chnat Seiñ Raij waphær waphær, kiwa da phah yaka kyrwoh sñiawlem cha ka yung ka sem yong i. Paan maap i na phi wa ym ye wow jer pyrtuid lut ya waroh, tangwa chim ya kani ka sñiawngooh wow man ko ya waroh lyngba uwa e ktien u Kolwit Chyrmang uwa man u pyrsa yong u Kñi Rangbah u Bud Chyrmang (Baam kwai ha dwar u Blai).
I neiliang yong ka yung ka sem, i tip i wa waroh phi sahnood phi na i daw wa ka laad ym chah ko ya phi wow wan sñiawlem khamtam wow wan e khublei khaddooh ya oo, tangwa phi pynsñiaw won phi yei mynsien sñiawsih yong phi lyngba ki Social Media waphær waphær cha ka yung ka sem yong i kam i dak wow e bor e mynsien ya i kiwa dang neh dang sah.
I chim i wa i phah yong phi ya i sñiawlem toh iwa yarap ya u dohnood wa i mynsien wa mong yong i. Ym ye i wow su kylliang ya i sbun mynsien yong phi, wei i da booh won i ya i ngooh i dem, i duwai phirat ha u Blai Trekirot Kynrad wow theh u i kyrkhu kyrdoh ya phi wa ya i yung i sem yong phi waroh wa phi u yoh phi yei chait i khiah khamtam ha kam ini i por wa wan ka khlam COVID-19 heiwa u Blai u ri u da u ya phi yow lait na i eh waroh.
Sa chisien ha ini i por, “Ma Khian laisuk laisaiñ baam kwai ha Dwar u Blai, chongsuk ha tyngkong u Blai”, kamwa man mi Sangia u Saret to ksan ñia ksang chang ya i kiwa ha yung hasem, ki kur ki jait, ki lok ki jor na jan wa na jngai waroh chihajar ngooh, pynkut ka kyrwoh na u Kolwit Chyrmang ryngkat wa kiwa ha yung hasem.
