Jowai: Ka Khasi Students’ Union (KSU) deiwa pynbait lang waka NESO wow pynman ya ka yakhih ha waroh ki jylla ka thaaiñ mihsngi wow pyrchah ya ka Citizenship (Amendment) Bill 2016 da rai wow pynman ya ka yalang paidbah (Public Meeting) ha ka 30 tarik uni u bnai ha Parking Lot Jaiaw ha Motphran heipor 12 waje pyrdi sngi.
Kamtæ ka seiñ da khut ko ya waroh ki paradoh parasnam na kylleiñ ka Bri U Hynñiewtrep wow wan chimbynta ha kani ka yalang paidbah kam chibynta wow pynsñiaw biang cha ka sorkar pyrdi wa ki paidbah tre ri ka jylla Meghalaya da iwi sur deilang wa waroh ki tre ri ka thaaiñ mihsngi wa ki pyrchah ki ya kani ka Bill kawa thmu wow pynkylla khian paaid ya ki tre ri ka jylla Meghalaya.
Ka KSU waka NESO da khut lang ko leh ya ki paidbah ka ri-loom Garo wow wan chimbynta lang ha kani ka yalang paidbah neibhah kiwa yahkhmat ka Garo Students’ Union leh da embynta lang ki.
Chooh chooh ka KSU ka khut sñiawbha ko leh ya ki seiñbhalang kiwa em sakhiat i kitkhlieh ya ka jaitbru kam ka FKJGP, HNYF, RBYF, AJYWO, SSSS, KWWADA wa kiwi kiwi wow wan chimbynta chit rhem lang ha kani ka yalang.
Ka seiñ da khut ko leh ya waroh kiwa yahkhmat wa ki dkhot warim yong ka seiñ wow ya ksoh kti lang ha katai ka yalang.
Ha chwa wow pynman ya kani ka Public Meeting daw em ka lai paidbah na yung krehkaam ka seiñ na Jaiaw Chapel Road chadooh cha thaw pynyeiñ kari ha Motphran.
Discussion about this post