Shillong: Kamwa jooh leh man u snem, ka 14 tarik uni u bnai ka sngi ka Seiñlang Seiñ Raij Niamtre Shillong ka tnat kawa pait wa yoo daka Seiñ Raij Niamtre Shillong da pynemwarom ko yei dap 40 snem i lai luti ka seiñ.
Ha kani ka sngi da wan ya sakhi lang da ki waheh ka seiñ na Shillong kamjooh leh kiwa na Jowai, heiwa u Puramon Kynjing Dolloi ka Elaka Jowai da man u kam u kongsan.
Ka phang yong kani ka sngi toh “Ka Pateiñ wa katni wow yah luti yaka mynried mankawi”.
Da yoh yei klam pdiang burom na u President ka Seiñ u Kerlangki Papang, wei ya ka bui krehkaam yong u snem 2016-17 da puræ da u Shngainki Pyrbot uwa man leh u Secretary ka Seiñlang.
U Joining Pde uwa man leh kam u President ka Seiñ Raij Shillong da ong u “haka 14 Naitung 1977 hapoh i pyllai yong u tynde u Lakhon Shullai deiwi i yumut da khut u ya ka yalang heiwow pyrkhat kammon u leh wow pyllang ya ki khynroo khyllood chirup, wei haka yalang da pynkha ya kani ka Seiñ heiwa yei pyrtuid da pachat da ka kong Berealty Pde dei pyrtuid Seinlang, wei da pynchiap u sei pyrtuid Seiñ Raij nakhmat yow yoh ka seiñ yei pyrtuid Seiñ Raij Niamtre Shillong”.
U Dolloi hei klam i yong oo da ong u wa boonsien boonsien leh ki bru ya ki kaam wow pynngait bru ymtoh wow pynngait blai wei emkaam leh u pyrkhat wa kam ki khynroo khyllood, ki wa toh neibynta ka seiñlang namo ka seiñlang neibynta yong ki mo.
Heijooh i por da ong u wa u symbe wa bet ki warim 40 snem nachwa toh u symbe wa miat wa bha, nadooh ka manyung wa duna hadooh ka manyung wa dap.
Ha kani ka sngi da yoh ya i sur rwai katkam ka phang wada pynwan dur da u Dauni Ram Kynjing, u Priyoo Laloo waka dhab tem ka Rikune, i chaad naki khon khynroo khyllood ka Seiñ Raij Shillong kamjooh naki khynnah wa chah sikai haka Skur Sikai Niamtre.
Da yoh leh ya ki kyntien ngooh blai na u Sienbeitki Challam wei da pynkut ya kani ka yachemlang da ki kyntien khublei naka Asst. Secretary ka seiñ ka Amanda Pariat.
Discussion about this post