Ka lehkmen Diwali toh kawi na ki lehkmen kawa khroo bha ya kiwa ngait niam Hindu kawa klam hajrong i jop i che yei langoh, i bha yei sih kamjooh man ko ka lehkmen wow wanrah yei roi i paar deilang i chongsuk wei yatylli.
Kani ka lehkmen katkam i ngait i sikai Hindu da pynyatoh leh ya ka wa ka Blai Lakshmi namo ka Blai i spah wei khamtam wa poi biang u Ram cha ka Hima Ayodhya chirup wa ka kurim ka yong oo, ka Sita wa u diah yong oo, u Lakshman hadien 14 snem.
Ha kini ki 14 snem da lai sah ki le ngut toh katkam wa phah u pa yong u Ram, u Syiem Dasharatha wow sah cha ki khloo ki kjam ki loom ki wah wow man kam u sadhu.
Heijooh i por kani ka lehkmen leh man ko kam chibynta wa tynyap ka Blai Kali ya waroh ki soitan kiwa kwah wow pyndooh jait ya ki bru kiwa em ha sla pyrthai.
Ha Jowai ya kani ka lehkmen da sdang ynnin i miet synyaaw da i Puja ha Shiv Mandir iwa em ha Iawmusiang wei da pynbood won yei thang bomkala ynne.
Ynne da e ya i Prasad ha kani ka Mandir heiwa da e leh da i Kheer wa i Khichdi wei da wan chimbynta ym du da kiwa ngait niam Hindu tangwa wot ki bru Pnar leh kamjooh.
Neiliang u Gopi Ram Sunar da ong u wa kam chibynta yong ka Diwali daw em leh ka Bhai Tika kam ka dak wow maya chipayu ha kani ka 3 tarik heiwa daw pynkhreh ya ki baam wa kyrpang ha yung ha sem.
Ha kani ka sngi da pynriam ya ki yung da ki khrik-khrak, da thang ya ki pyrdit wei kamjooh leh da thang ya ki bomkala.
Discussion about this post