Jowai: Ka Jawahar Navodaya Vidyalaya, Mukhla ynne ka sngi da leh warom ko ya ka lyngkhooh snem dap 25 snem yong ka wei da wan sakhi yeini da u Deputy Commissioner ka West Jaiñtia Hills u wa man leh kam u Chairman ka JNV, u Arunkumar Kembhavi, IAS.
Ha kani ka sngi da sdang ya ka lehkmen da wai ya ka da i ah ribbon wei wow thang ya ka charak kamjooh wow ah ya u Cake wa chna kyrpang yeiwa da leh da u Superintendent of Police WJH, u R. Muthu, IPS, hei emlang u Deputy CEM Jaiñtia Hills Autonomous District Council u Andrew Shullai, Rtd. Assistant Commissioner, NVR, RO Shillong W.Tariang.
Da pdiang burom ya waroh ha kani ka sngi da u Principal ka JNV, u Ravindra Kumar Dixit uwa da khana leh ya i lai luti ka skur.
Ka skur JNV Mukhla toh ka wa puræ lang chynrang wa kynthai wei katni ka skur da em ko ha ri-loom Jaiñtia ha Mukhla hapoh ka Thadlaskeiñ Block.
Kani ka skur da bood ko ya i rukom sikai ka Central Board of School Education (CBSE) wei da seiñ ya ka ha u snem 1991 dei thmu wow kyntu ya ki khynnah puræ wa wan na ki yung wa dooh wa duk yow yoh ki ki laad wow lai cha khmat ha i puræ puthi.
Ya ka skur da sdang ya ka ha ri-loom Jaiñtia ha u snem 01 Naitung (April) 2005 deiwa booh ya ka ha Khliehtyrshi ya kiwa puræ Class VI hadooh Class XII.
Katwa man kattæ ha Mukhla da em 558 ngut ki khynnah wa puræ ha kani ka skur wa kynthup ya 249 ngut ki kynthai wa 264 ngut ki chynrang waroh kiwa sah ha ki Hostel yong kani ka skur.
Kamwa man kattæ ka kyrdan XII da em ya ka puræ Arts wa ka Science. Kamtæ u DC ka WJH da yaroh u ya ki moomer wa kani ka skur da kaap ko wei pynkynmoo u wa i puræ puthi ym toh du yei wow yoh kreh kamjooh leh wow kyntu ya ka imlang sah lang.
Heijooh i por leh ym hoi u mylliñ ya i thong yong i samen yow yoh i i hun mynsien deiwa kreh chimtom yow poi cha ka thong wa da booh i.
Da pynbna u leh wa daw e khusnaam cha kiwa puræ wa dooh ya ki kot ki sla ha ka Library kani ka skur.
Da pynphooh pynphieñ ya kani ka sngi da ki rwai wa ki chaad na ki khynnah ka JNV.
Discussion about this post