Ka lympung yalehke sports ka Jalaphet Cluster Resource Centre wa ar sngi

Jowai : Ka lympung sport wa da tip kam ka Inter School Sports Meet yong ki chnong wahaap hapoh ka Jalaphet Cluster Resource Centre da man ko kawa lai bait heiwa da yachimbynta hadooh 13 tylli ki skur ha madan Kdoh Mooid ha chnong Jalaphet.

Ya kani ka lympung da pynman arsngi lynter haka 7 tarik waka 8 tarik u Naitung heiwa ha ka sngi wa nynkong yong kani ka lympung da em chwa ka yalang wai da u ma Roskil Nongtdu, Waheh Chnong warim ka Chnong Mopala kam u Kongsan, hei emlang u OC ka Khliehriat u ma Lyngkhoi wa kiwi kiwi.

U ma  Roskil hawa e yei klam da ong u wa ka sport hi man ko kawa emkaam bha ya waroh, neibhah lyngba i ka-it sport bunsien u bru yoh u yei doh i pran wa chait wa khiah, wei kawa ye u e khih e kreh yow bru.

Kiwi won wa e yei klam toh u Hill Chyrmang, ma Henro Dkhar wa kiwi haka yalang wada pynlai da u ma Leadsly Chyrmang.

Related posts

District Cricket League: Jop ka Young Lad’s ya ka Phramer

May 13, 2025

Deilang ki yakob rwai wei chaad ha ka yakhun Final ka 1st War Jaiñtia Invitational Football Tournament

May 11, 2025

Hadien wada dep ka yalang da yoh yaka March Pass ka drill na ki skur waphær waphær yong ka chnong Jalaphet kiwa kynthup ya ka Jalaphet U.P.School, Jalaphet Presbyterian U.P.School, Shur Shur U.P School, Syrlein U.P School,  Sein Raij Secondary School, Hynniawkilo L.P. School, Urshuni L.P. School wa kiwi kiwi.

Ha kani ka sngi da yoh leh yaka yakhun phet pyllah hapyrdi ki khynnah kynthai wa chynrang katkam i kyrdan waphær waphær, kam ka yaphet pyllah 100 meter 200 meter wa kiwi kiwa kynthup yaka High jump.

Yei naam Best March Past ha uni u snem naka L.P. School da yoh daka Pesbyterian L.P. School, naka  U.P. da yoh daka Seiñ Raji Secondary, yei naam best discipline na ka L.P. skur da yoh daka Shur Shur L.P. School katwa na ka U.P. skur da yoh daka JaLaphet Circle U.P. school, yei naam Best Drill haka L.P. da yoh daka Jalaphet Niaw kilo L.P. haka U.P. da yoh daka Presbytarian U.P. School.

Yei naam best athlete Senior Boys da rah da u Banjop Chyrmang Syrlein na ka U.P. School katwa ya ka Junior Boys do yoh u Vincent Chyrmang na ka Jalaphet U.P School

Ya kani ka lympung lehke sport da wan pynhaap pyrda da u ma Pilias dkhar rangbah chnong ka Tluh hei emlang u ma Chai Chymang Waheh Chnong warim ka Jalaphet kam u symbood kongsan.