Shillong : Da pynman ya ka lyngkhooh snem wa 53 ka Dorbar niamtre ka Seiñ Raij Niamtre Shillong ynnin ka 8 Naisan 2016 ha yung dorbar ka Seiñ Raij Shillong.
Da sdang ya lehkmen ynnin da ka ngooh ka dem dei suit dei choor da u klong u skoo na u kñi ka Seiñ Raij u Wh. Pyndaplang Passah. Da pyllai yaka lehkmen da u Wh. Leeno Shylla, uwa man kam u Chairman, Niamtre Committee wei bood won dei pynhær yaka lama ka seiñ da u kongsan kani ka sngi u Wh. Ngaitlang Dhar, MLA.
Da yoh yei klam pdiang burom na u President ka Seiñ Raij u Wh. Joining Pde heiwa da klam u ya i lai luti ka seiñ yeiwa da pynbood dei rwai (theme song) “KSOH KUNE WA MAKHANE” iwa da thoh da u khynroo Dauni Ram Kynjin wei da e sur da u Priyo Laloo.
Dayoh leh yei klam na u Wh. Dr. Omarlin Kyndiah hajrong ka phang “KSOH, KUNE WA MAKHANE” wei da klam u yei thmu (vision) ka seiñ ha kini ki snem wa daw wan.
Da e i rwai na ka Sein Raij Music school, Chaad Sukra na ka Seiñlang Seiñ Raij Niamtre, wa i rwai na ki khynroo ka Seng Khasi Sengkmie Mawkhar.
Da yoh yei klam na u Wh. Banteilang S Rumnong, President, Seng Khasi Mawkhar heiwa da klam u yei ya kreh lang wa ka Seiñ Raij Niamtre Shillong, rynkat wei sneiñ i kroo.
Da yoh yei klam na u Wh. Naitlang Dhar kam u kongsan ha kani ka sngi heiwa da yaroh u ya i krehkaam ka Sein Raij Niamtre Shillong ryngkat wei kyrsu kyntu.
Da e ya ka ngooh ka dem heiwa pynkut na u Wh. Raymond Nartiang, Pator Elaka Jwai.
Da e khublei na u Wh. Shngainki Pyrbot, uwa man kam u Secretary, Niamtre ka Seiñ Raij Shillong.
Kamwow pynkynmoo heini, toh ha ka 3 Tarik Naisan 1963 da seiñ yaka Seiñ Raij Niamtre Shillong hadien wa yachem ynru ngut ki waheh ha dukan soor u wh (T) Bechon Lanong ha Iewduh. Heini ryngkat u (T) Laian Kynjin (Daloi warim ka Elaka Jwai), (T) G.D.Pde, (T) S. Moulting Shylla, (T) B. Nikhla wa u Ram Paswet da mih i pyrkhat wow pynneh pynsah ya ka niam ka rukom dustur riti wei wow pynlum pyllang ya ki khon ka Niamtre wa em ha sor Shillong.
Discussion about this post