Shillong: Ka sorkar da pynche ko wa ym em kiwa dang yoh thymme ya u khñiang COVID-19 ha ka thaaiñ Jirang, Ri-Bhoi District kamwa da poor ki khubor, tangwa ka manbei wa yoh ya u khñiang COVID-19 toh kawa na Assam wei kawa sah khappood waka Meghalaya.
Hawa klam wa ki laad pathai khubor, u Montri wa pait yaka chait i khiah haka jylla, u Alexander Laloo Hek da pyntip u wa hadien wa da lai sylli da ki Doctor waka chnat ha ka chnong Ampata da chem wa em kawi ka manbei kawa yoh COVID-19, tangwa ym toh won kawa na jylla Meghalaya wei kawa sah cha chiliang u sarok wa haap hapoh ka jylla Assam.
Hawa kylli, neiliang u Symbood Montri Rangbah, u Prestone Tynsong da ong u wa neidaw wa toh mar chiliang u sarok khappood, neiliang ka chnat i chait i khiah yong ka jylla ynne da booddien ko ya em ki bru kiwa napoh ka jylla kiwa yachem wa kani ka manbei wei ka chnat daw leh ko ya waroh iwa emkaam wow pyntikna wa ym poor cha kiwa chong chnong ka jylla.
Ha iwi won i liang, u Hek da pyntip u wa ki nongmuna (Sample) wa da dep wow Test hadooh ynne ka sngi ki man ki 14,147 tylli, heiwa kiwa wym em chem iyi iyi wa chah ktah namo kiwa man Negative da em ki 13,303, katwa ki Test wa dang yang yaka Report em ki 800 tylli, da pyntip u leh wa hadooh ynne ka sngi da em 26 ngut kiwa da chait na u khñiang COVID-19 wa 17 ngut won kiwa dang em ya uni u khñiang lane kiwa dang man Active.
Heiyatoh wa i khonboo wa dang kha yong kawa yoh COVID-19 kawa kha khon ha NEIGRIHMS da pyntip u wa ym pu em dep Test ya ini i khonboo.
Chooh chooh da ong u wa hei boodien wei Test ya kiwa yachem wa yajan wa kiwa yoh COVID-19, ym em naki wa yoh COVID-19. Ki thaw Test hapoh ka jylla da pyntip u wa em kawi ha Tura wa kawi ha NEIGRIHMS.
Heiyatoh won wa kiwa chong chnong kiwa da liwan hadooh ynnne ka sngi, da em ki 15454 ngut.
U Prestone da pyntip u wa kiwa liwan da em ki palat ya kiwa da Register wei ym ye ki wow kyntait yaki payu para kiwa chong chnong ka jylla.
