Jowai : Ynne u EM wapait ya ka kaam poisa poilaiñ da wanrah u ya i lut i san yong ka JHADC kawa T. 85,28,21,900 kawa duna kamwa T. 1,92,73,300 ha ka sngi dorbar mang poisa ka Council.
Ka JHADC da antaad ko yow yoh nong ki kamwa T. 83,35,48,600 ha u snem 2016-17.
Hawa wanrah ya ka mang poisa u EM in charge u Joinriwell Pyrtuh da pyntip u ya ka Dorbar wa i duna ka poisa toh neidaw wa boon i bailutsan, ki kudor ki mar wa kiwi kiwi.
Ini i ku ka bailutsan toh neidaw wa ku wow i bai pynkreh, i ku tulop kiwa kreh, wei i ku i lut man ka sngi (Dearness Allowance) da ong u Pyrtuh.
U EM wa pait ya ka kata poisa da ong u ha ka dorbar, wa i lutsan palat ya ka T 1.92 klur da kynthup yow pynskem yei rukom kreh kiwa boon, khamtam yow pyntikna i rukom kreh wa lai bait lai ryntih hapoh ka council.
Ka JHADC da thmu ko leh yow chna ki ya ka website yong ka hi, kamjooh leh yow pynkreh kaam ya ki wa boon ki tnat deiwa pynemkaam katkam ka juk katni lyngba ki kor computer kam ha ka tnat Finance and Account deiwa yakrelang lyngba wa ka “Treasury Network” chirup wa ki Bank neibynta ka Internet Banking. Chooh chooh lyngba ka Internet yow e noh ya ki Sanad cha ki Waheh Chnong wa ki Dolloi neini chaphrang.
Da em leh i thmu yow pynmiat yei thaw nohjhep ha Mynkjai kamjooh leh yow pynkhlan ya ka tnat Fishery deiwa sdang ya ka Fish Sanctuary ka wow da wow ker ya ki um ki wah ha kyllieñ ka ri-loom Jaiñtia.
Hei yatoh wei yoh yarap poisa wa daw yoh na ka sorkar bei lyngba ka Ministry of Tribal Affairs, u ma Pyrtuh da pyntip u wa ka sorkar bei da mang ko T. 3.30 klur yow chna ya ka yung warim ka JHADC kawa da antad i lut ha u snem 2015-16.
Kamjooh leh ka council heijooh i por ympu yoh ko ya ka poisa T. 33.57 klur kam ka Special One Time Central Assistance ya kawa da e da ka Ministry of Finance yong ka sorkar India.
U EM ka Finance da kyntu u ya waroh ki dkhot ka yung Dorbar yow embynta lang ki yow pachat yumut ki ha ka dorbar hachwa wow pyllait ya ka mang poisa neibynta i bha i miat ka Council wa ki bru ka Jaiñtia Hills.
Discussion about this post