I kreh chitom da ki boon snem da pynmihsoh da pynmihsla ko ya ka Mawlai SC heiwa ynnin da jop ki ya ka Final ka 4th Meghalaya State League 2024 deiwa yachut Tie-Breaker da 5-4 pyrchah ya ka Shillong Lajong FC kawa da pynman ha Wahiajer Multipurpose Sports Complex Stadium.
Ka yalehke hadien wa kut ki 90 minit, wa sa 30 minit ka Extra Time ym em wa yoh u thap kool iwa pynpoi ya ka yalehke cha ka yachut Tie-Breaker.
Ha ka yachut Tie-Breaker manda wan uwa yalehke ka Lajong, u Firstborn Roy Khongsti wow chut ya kawa le, uwa yang kool ka Mawlai, u Lambhamiki Lamare da ye u wow khanglaad wei ini da pynjop ko ya ka Mawlai.
Ka Mawlai da yoh ko leh ya ka Cheque kawa Rs. 5 lak deilang ka Trophy kawa da saam da u Deputy Chief Minister, u Sniawbhalang Dhar deiwa emlang u MLA ka Jowai, u Wailadmiki Shylla, u Preisdent ka Meghalaya Football Association, u Hamletson Dohling deilang wa kiwi de heiwa ka Lajong kam kawa rem da yoh ko Rs. 3 lak.
Ka Mawlai da man ko leh kawa soo wa jop ya ka MSL iwa mut wa kut i sien wa pynman ym pu em wa jop da ka jooh ka liang ar sien. Nyngkong da jop ka Niaw Wasa United pynbood sa ka Lajong ha u 2019, ka Rangdajied United ha u 2023 kattæ won ka Mawlai.
Ka Mawlai da jop ko leh ya ka SPL ha u 2022 wa u 2023 wei kattu sa ka MSL 2024 hapoh u Hering Shangpliang kam u Coach.
Yei naam Player of the Final da yoh u Iohborlang Lyngdoh Lyngkhoi na ka Lajong katwa kiwi da lai ki cha kiwa yalehke ka Mawlai – U Lambhamiki Lamare (Golden Glove kam u Best Goalkeeper), Khrawkupar Jana (Golden Boot kam u Top Scorer; uwa yoh u thap 12 kool) wa u Damanbhalang Chyne (Golden Ball kam u Player of the Tournament).
Discussion about this post