U dkhot ka Hynniewtrep Border Dispute Redressal Forum (HBDRF), u Thomas Passah da ong u wa ym em i yoh myntoi ka jylla Meghalaya ha ka soskular namo ka MoU wa dadep soi da ki ar jylla wow pynbait ya u pood u ang,
Hawa kylli da ong u wa ka sorkar jylla da yoh ko 18.33 Sq/Km na ka 36.79 Sq/Km, u Thomas da ong u wa ym em i yoh myntoi neibhah waroh 36.79 Sq/Km toh ki thaw ka Meghalaya katkam ka North East Reorganisation Act, 1972, wei ha i pynbait pood da e mynkna ya ka Assam hadooh 18.46 Sq/Km i thaw.
Da ong u wa i pynbait pood da em i yaklam wow e markylliang namo ka ‘Give and Take’ tangwa ha ka soskular wa da soi da ki ar ngut ki Montri Rangbah em du i e namo i ‘Give’ na ka Meghalaya.
Hajrong i wym ye de ka sorkar wow kyruiñ næ pait biang ya ka MoU, u Thomas da ong u wa ka Forum daw embynta ko wa ki kattu katni ki seiñ kiwa yakhun ya ini i kaam wei ka Forum da e kyrchaan ko ya ka District Council wow ujor cha Kasari.
Ka HBDRF da dawa ko leh yei pynche na waroh arliang, kitæ na ka sorkar jylla wa na ki seiñ ri-loom kiwa emlang ha ka sorkar wei kamjooh ha KHADC hawa yatoh wa i pynbait ya u pood u ang ha ka bhah wa nyngkong, neibhah kamwa man, ki seiñ ri-loom ki emlang ki ha ka sorkar wei toh ki seiñ ri-loom kiwa yahkhmat ha i synchaar ya ka Khasi Hills Autonomous District Council.
U Thomas Passah da ong u wa i klam yong u Montri Rangbah, u Conrad K Sangma da emkaam ki chiboon i pynche, khamtam wa ki seiñ ri-loom da toh paan pynche ki. Da ong u leh wa lada ya ka pynbait da chim katkam ka bui (Report) 2011, ileh wa da chna ya ki Regional Committee, wei ini toh du i pynbiej yong ka sorkar ya ki paidbah.
