Jowai : Ka Chutwakhu Social Welfare Local Dorbar kam wow pynchlur ya ki khynroo khyllood ka dorbar yow pynyoo yei sap yong ki kamjooh wow tipmit yei naam wa da wanrah ki, da pynman ki ynnin ka 27 tarik ya ka saam khusnaam cha ki dkhot ka dong wei da pynman ki leh ya ka yakop miat kynthai bha chynrang wa tip kam ka ‘Teenager of the year.’
Ya kani ka miet da wan sakhi da u Moonlight Pariat kam u kongsan uwa saam leh ya ka khusnaam ‘Lifetime Achievement Award’ cha u Kamai War kam wow burom ya waroh wa dep leh u ha i rta yong oo uwa dep yoh leh ya ka Tirot Singh Award na ka sorkar jylla, kamjooh man u uwa thoh droma, thoh sur wei da em u leh ya ka Museum ha yung yong oo kawa da pawnaam bha.
Ha kani ka miet leh da saam ya ki khusnaam cha kiwa da leh bha ha i puræ puthi kamjooh ha ki kaam sports kiwa da mih khmat ya ka district wa ya ka dhab tem ka ‘The Lynx’.
Hei yatoh wa ka yakop ‘Teenager of the year’ da wan chimbynta 13 ngut ki kynthai wa 7 ngut ki chynrang.
Hadien wa dep kylliang riam soo sien wa kyntup yei riam tynre (Traditional Round), Sports Round, Fancy Dress Round wa ka Formal Round da pynman sa ka kylla wa khaddooh heiwa waroh kiwa chim bynta da jubab ki ya i jooh i kylli wa da booh ha ki hei yatoh wa i ya krehlang ha ka imlang sahlang.
Kiwa bichaar da yoobiang ki u jied ki neiliang ka kynthai ya ka Catherine Enkardia Chullai kam kawa jop, pynbood sa ka Deimaiami Challam katwa ka Elisian Dkhar da yoh wa le ko.
Na ki chynrang won da jop u Remedyson Dkhar, da wan wa ar u Wandame Dkhar katwa yei kyrdan wa le won da yoh u Jandynard Lynthong.
Yow pynchongchit chooh chooh ya kani ka miet da em leh ki rwai ki chaad na ki dkhot ka Chutwakhu kiwa pynchoh biej ya waroh wa wan sakhi.
Ya kani ka yakop da pynman hapoh ka Indoor Sports Hall cum Auditorium, Chutwaku.
Discussion about this post