Shillong: Kam chibynta wow sahkynmoo yei pynkrehkaam yaka aiñ Indian Legal Services Authorities Act 1987, kawa da tip kam ka Legal Services Day heiwa ya kani ka sngi ha Meghalaya da lehkmen yaka daka Meghalaya Legal Services Authority (MSLSA), da i thmu toh wow wanrah yei pynsñiawthooh chaphang ka aiñ cha ki paidbah.
Hawa yaklam wa ki laad pathai khubor, u N.A. Khan, Member Secretary MSLSA da ong u wa i thong ka Legal Services Authority ha kyrdan ka ri, jylla, District wa Sub-Divisiona toh wow pyntikna wa ki bru yoh yarap mynkna ki heiyatoh waka aiñ khamtam ya kitu kiwa man kiwa thlot haka umlang sahlang. Chooh chooh da pyntip u wa da em 130 ngut ki muktiar kiwa da yaleh ya 408 tylli ki mukotduma kiwa 407 toh kiwa yatoh wa i chah thombor wa kawi kawa yatoh i ya kajia hapyrdi ki arliang. Da em 10 ngut ki muktiar ha High Court kiwa yasaaid yaki mukotduma dei mynkna ya kitu kiwa ym ye wow su daka poisa.
Yow yarap yaki bru wa wan wow choh dwar haka yung bichaar, da booh yaki 8 tylli ki yungkrehkaam ha ki District ka jylla. Nadooh u Duiatra (Jan), 2020 hadooh ynne ka sngi da em 924 ngut ki bru kiwa da wa cha kini ki yung krehkaam wei da ye wow yarap ya 573 ngut.
Deiwa bood yaka hukum ka Supreme Court yow pynkyllooid yaki patok, da yarap wow pynlait ya kamwa 400 ngut ki koidi deiwa pyrkhat yaka khlam COVID-19, wei kini ki 400 ngut toh kiwa emkti haki kaam pyrchah yaka aiñ kiwa khian wa nai wei da yarap wow pynyoh jamin yaki.
Hapoh ka Meghalaya Victims Compensation Scheme 2019, 153 ngut ki bru da tyrwa daka District Legal Services Authority yow yoh ki yaka bai lutsan iwa da poi T. 45,95,000 ha ki kaam wa yatoh wa i salitbor wa T. 11,00,000 da su kam ka kuna.
Kam chibynta wow pynsñiawthooh yaki paidbah yei hok yong ki, ki kaam yong ki kamjooh ki myntoi wa toh u yoh ki naki Scheme sorkar, ka State waka District Legal Services Authority da ye ki wow yarap ya 1670 ngut ki kynthai, 449 ngut ki khynnah, 272 ngut kiwa chong chnong kiwa da heh rta wa 134 ngut ki bru wa em i duna hei doh i pran wa hei bor pyrkhat.
U N.A. Khan da pyntip u leh wa da em 233 ngut ki Para Legal Volunteers kiwa da booh haki yung krehkaam ka sorkar hadooh ki Police Station yow yarap ya kitu kiwa tlot kiwa emkaam yarap wei nadooh wa sdang uni u snem da em 567 ngut ki bru kiwa da yoh myntoi na ki 70 tylli ki Legal Care wa ki Support Centre wa em ha kylleiñ ka jylla.
