Kat dang lai ki por i sñiaw yei emkaam wow pynneh pynsah yei yirngam ka pyrthai nang thai i wei kat chawa lai wa wan boonsien ki bru wot hadooh ka sorkar klam ki wow yada ya ka rymaw tangwa kawi na ki chnong kawa da yahkhmat yeitæ ym da i ktien tangwa da ki kaam toh ka chnong Moolamylliang, East Jaiñtia Hills.
Kani ka chnong kawa em kamwa 150 tylli ki manyung wei ha kini ki soo san snem da sdang ko u kylla dur wei katni da sdang ko u bna i naam yong ka kylleiñ ka Ri-loom Jaiñtia kam kawi na ki chnong wa smat dooh u yirngam.
Ini i kylla da sdang i du na i chong khana parom yong lok ki waheh ka chnong ha ka 19 Naitung 2014 heiwa da pyrkhat ki kammon wow leh wow pynmiatdur ya ka chnong wa maya yong ki.
Katni ha tymbud ki sarok hapoh ka chnong da em du ki dieñ mar chiliang wei ki thaw ka chnong leh da pynwandur ya ki kam ki kpær khian wei da man ki kiwa da yirngam da ki phlang, ki syntu wa ki dieñ khian wei ki sarok ki luti syngkieñ leh man ki kiwa khooid.
Ha kini ki sngi ki khon ka chnong chynrang wa kynthai da chim ki ya ka lyngkor wow pynkhooid ya ka chnong yong ki man ki por wei ha man la ka sngi Chohthat mih yonglang ki wow pynkhooid ya ka.
Hawa yaklam wa u Waheh Chnong ka Moolamylliang, u Apmon Pachiang da pyntip u wa dang nachwa ka chnong da man ko kawa yap wei katni da ye biang u pynim u pynyirngam ya ka deiwa chimkhia ki bor pynlai chnong.
Da ong u wa i raikut ki khynroo khyllood ka chnong da ye sakhiat wow yoh yeini i kylla wei wot ki waheh wasian leh katni dang kwah chooh chooh ki u yoo yeini i kylla sam chaphrang.
U Apmon da ong u leh wa ka chnong katni man ko kawi na ki chnong wa yirngam dooh hapoh Ri-loom Jaiñtia wei ini waroh dang man i du kamwa 30% donhi neiwa angnood ki khon yong ka.
Hajrong ini i raikut wow pynyirngam biang ya ka chnong, u Apmon da ong u wa iyi u myntoi u khooid du ha yung katwa cha lait won ym em wei lada kamtæ emkaam hi wow khooid na yung cha lait leh kamjooh.
Da pynrap u leh wa nachwa ym em wa tip ya ka chnong Moolamylliang wei katni da sdang paw i pyrtuid ko wei kwah u leh wa ki bru u wan uiñke ki leh chapoh ka chnong wei wa mynried boi neini daw ye ki khon ka chnong u yoh khih yoh kreh neitæ.
Da kyntu u leh ya kiwi ki bor chnong wow man ki kiwa kitkhlieh wei wow yahluti nakhmat neibhah lada man kamtæ ki paidbah leh daw bood ki ya ki luti krehkaam ka chnong wei da kyntu u leh wow pynkrehkaam hok ya ki Scheme wa e ka sorkar wei wow pynman ya ka jylla Meghalaya kam kawi na ki jylla wa bna naam.
