Jowai: Kam chibynta i lehkmen ya ka World Tourism Day Celebration, ka yungkrehkaam u Deputy Commissioner ka East Jaiñtia Hills hei yakrehlang wa ka Dorbar Chnong ka Mutong ynnin ka 27 tarik da pynman ki ya ka “Moopun Waterfall Festival” ha chnong Mutong ka chnong wa ye u man kam kawi na ki thaw wa pawnaam ha ka kaam uiñke suwari hapoh ka East Jaiñtia Hills.
U Deputy Commissioner u MS Lhuid ha kani ka sngi da wai u leh ya ka Moopun Waterfall Park kawa da chna da kiwa chong chnong wa kyrchaan poisa da ka yungkrehkaam ka C&RD, Khliehriat lyngba ka MGNREGS, ka yungkrehkaam u DC wa ka Basin Development, Khliehriat Unit.
Da pynlut kamwa T. 12 lak wei da pyndep ya kani ka Park hapoh chi bnai dei kreh chitom ki wa chong chnong ka Mutong (Kiwa em Job Card).
U waheh chnong u Helping Phawa da pyntip u wa kani man ko ka thong yong ki san chnong wa kynthup ya ka Pynthorsale, Mukhaialong, Mutong, Cham Cham wa ka Lumshyrmit yow pynpawnaam ya kani ka thaiñ wei ha kini ki san chnong em boon ki thaw wa miat ki wow pynchohbiej ya kiwa wan ke kam ka kchaaid Moopun, ka Sahksaw, Kai Langdong wa ka kchaaid Rynji.
U Deputy Commissioner won da ong u wa ki bor ka District da leh ki katwa ye wow kyntu ya yei kyrdan wa im ki bru lyngba ki kaam uiñke suwari.
Da ong u leh wa kiwa boon ki bru hapoh East Jaiñtia da chaniah ki ha u mooyong wa kiwi ki kaam wa yatoh wa u mooyong yow imja ki tangwa boon da dooh khih ki hadien wa khang ka NGT wow tih mooyong.
Kamtæ ka bor district da pyrchang ki u pynchlur wow sdang noh da ki kaam uiñke suwari kawa man kawi na ki jait kaam wa e khih dooh ya ki bru hapoh ka pyrthai wei ha East Jaiñtia da jied leh ya ka Tuberkmai Shnong, Mutong, Cham Cham wa ka Lumchnong kam kiwi ki thaw wow pynman kam ki thaw uiñke suwari.
Ha kani ka sngi da em leh boon ki yakop kam ka yakop yimpa, chondur, siat khnam, i phet Cross Country wa kiwi kiwi.
Discussion about this post