Jowai : Ka mukotdama (PIL) hei yatoh wei kaam khianpaaid ki bru wa bood ya ka Niamtre wa ka Seng Khasi da file ka kong Khasimon Phanbuh wa u Powell P. Lyngdoh. Ynne ka sngi 13 tarik da e hukum ka yung bichar Meghalaya High Court, yow phah noh ka sorkar Meghalaya cha ka sorkar India wa ya ki wa bood ya ka niam khian paaid kam ka Niam Khasi wa ka Niamtre toh u yoh ki ya waroh ki myntoi wa toh u yoh kiwa khian paid kam ki Scholarship wa kiwi weiwa waroh toh u pyndep hapoh 8 tayaw nadooh wa mih ka hukum wa ynne ka sngi.
Da emlang leh u Chief Secretary ka jylla u ma PBO Warjri u wa ong wa hapoh ka jylla waroh kiwa bru man ki salonsar.
Tangwa na liang u muktiar yong ki wa e mukotduma da ong u wa ini waroh ymtoh iwa sakhait neibhah ka sorkar Meghalaya hadooh katni leh ym pu em tipmit ko ya ki Niam Khasi wa ka Niamtre kam ki Religious Minority kamtæ boon ki myntoi watoh u yoh ki da dooh ki.
Katkam kiwa ujor mukotduma da kynnoh ki wa ki Ñiam Khasi wa ki Ñiam Tre da dooh ki yei hok yong ki katkam ka Fundamental Rights khamtam ka kyndon Articles 29 wa ka 30 yong ka Constitution ka ri India.
Katkam ka National Commission for Minoritites Act, 1992 da ong wa ya ki khian paaid toh u tipmit da ki sorkar jylla. Kamtæ ka yung bichar da snaiw phylla ko wa hadein 23 snem leh ka sorkar Meghalaya ym pu leh ko yeini waroh.
Da em leh ka hukum (notification) ha ka 21 tarik Kmaichonglad yow chna ya ka Task Force on Minorities wa da man Chairperson da u T. Dkhar kawa da chah hukum leh u e ya ka report hapoh le tayaw.
Kamwa man kattæ ki Kristan ka Meghalaya da yoh ki ya waroh ki myntoi nadooh ki scholarship kamjooh ya ka Religious Minority wa ka ST status. Tangwa ki wa em ha ka Niamtre kat ya ki myntoi wa yoh deiwa tip mit ya ki kam ki Religious Minority ym yoh ki ka kam ha ki por wa thap ki ya ki scholarship hajrong ka nongrim wa ki toh ki Religious Minority.
Discussion about this post