Ki waheh ka chnong Mukroh kiwa kynthup ya u Hamarbathmu Maskut, Secretary, u Hamboide Sumer, Waheh Chnong wa u Deibormi Lamin kam u Chairman ka chnong Mukroh da pynche ki wa ka Mukroh haap ko pura hapoh ka jylla Meghalaya wei ym em haap ko ha Block-I kamwa da kam da kiwa boon.
Ya ini da pynsakhiat ki waheh ka chnong Mukroh katkam ka Map wa da yoh na ka District Council nadooh ka 25 Naichiphaw 1968 heiwa ya i khloo wa kam ka Assam da kynthup hapoh kani ka Map kam ka Khloo Chnong Mukroh.
Neiliang u Hamboide Sumer uwa man u Waheh Chnong ka Mukroh da kdaw u wa kani ka Map pynyoo ko wa ka chnong Mukroh haap ko hapoh ka Jaiñtia Hills heiwa da kdaw u ya ka Wah Mynriang wa ka Wah Myntang waka thaaiñ wa yabi waka Elaka Labang Nangphyllut wa katni da tip kam kam ka Block-I.
Da ong u wa nachwa u pood ka chnong toh nadooh na Mutha Siangkwai tangwa katni da knieh ka Assam ya ini i thaw wei da chong chnong noh da ki Karbi wei da tip noh ya ini i thaw kam ka Umlawan (iwa chapoh ka chnong Mukroh).
Da ong leh wa hajrong ki Patta wa ki Land Holding da chim ki toh du na ka JHADC nadooh nachwa hadooh kini ki sngi.
Heiyatoh wa i jia ha ka 22 tarik neiliang u Waheh chnong da kdaw u wa i thaw wa chah siat ki san ngut toh i Mukroh Lumpalang iwa jngai kamwa 9-10 Km na Mokoilum (dang nachwa wa jooh haap ha Ri-loom Jaiñtia).
Da ban joor ki leh wa ka sorkar Assam u pynuiñ biang ko ya ki thaw wa da chah knieh na ka chnong katkam kani ka Map wa da em yong ka chnong khnang wow wanrah biang yei chongsuk chongsaiñ wei wow kyrriah noh ya ka Forest Beat House ka Assam wa em ha Mukroh Khlieh Sanaro.
Sñiawbha pait ya ini i Video hawah yow yoh phi u tip deiwa che.
