Ka Ministry of New and Renewable Energy ryngkat i krehlang waka Meghalaya Non-Conventional & Rural Energy Development Agency (MNREDA) da pynman ko ya kiwa boon tylli ki yalang yow pynsñiawthooh yei emkaam wow pynneh pynsah ya ka rymaw wei ha ka yalang wa da pynman ha State Convention Centre, Shillong da man ka kynti wow e yutip cha kiwa chong chnong wow pdiang ki yeini deiwa pynchlur ya ki manyung ka jylla u pynemkaam ki ya i bor ka sngi wow pynmih bordiñ.
Ki bru chemphang na ka Meghalaya Non-Conventional & Rural Energy Development Agency da yoh ki wow e yei batai wa bniah bha hajrong ini i kaam wow lai i chaphrang wow pynemkaam bordiñ da kiwa mih na ka bei rym-aw hapoh ka jylla.
Neiliang ki paidbah da yoh ki leh wow sakhi ya ki laad hajrong kammon wow chimbynta na ka jylla hi deiwa yoh ki yei batai wa yillu na ka Elizabeth Kharjana, Project Officer MNREDA.
Kam chibynta yong kani ka lehkmen, ki soo tylli ki skur wa kynthup ya ka Brookside Adventist Higher Secondary School, St. George Higher Secondary School, Laban Assamese Girls Higher Secondary School wa Bhanu Bhakta Nepali Pro Secondary School da chimbynta ki ha ka yakob dro dur hajrong ka phang “Renewable Energy for a Better Tomorrow.”
Iwa khroo yong ini i chimbynta pynyoo i yei yooluti ki khynnah khynroo hajrong i emkaam ya ka bordiñ kawa ym kut de wei da sakhi leh yei pynyooo rong ya ki kattu katni ki tiar kiwa ympu mih pyrthai iwa da e laad ya kiwa wan sakhi wow phyllu yumut khamtam heiyatoh wa ka Solar Mission kawa man ka phang wa pyrdi ka sorkar Meghalaya wow wanrah ko ha kani ka kynti.
Kini ki jait tiar da pynyoo nuksa ki kammon wow pynkhreh ka sorkar wow wanrah noh da ki bor yong ka rymaw neibynta wow pynmih bordiñ deiwa chna pynmiat chibhah chisien.
Ha ka yalang da yoh leh i klam hajrong ki bor kiwa em ha ka rymaw na u Arup Chakraborty uwa man u Junior Engineer ka MNREDA, uwa da pynyoo din pa din ki laad ki luti kiwa ye wow yoh myntoi ha ka jylla.
Hadien ini da yoh leh i klam pynche na ki waheh chnong wa kynthup nadooh kiwa na Sunny Hill, Lumdiengtri, Lama Villa, Jaiaw Langsning, Dymmiew, Lumkshaid, Mawprem, Qualapaty, Nongsohphoh wa Laitumkhrah.
Kani ka yalang da pynlai yumut ko leh hajrong ka PM Kusum Scheme wa ka Biogas Scheme heiwa u Arup Chakraborty wa u Assistant Director(Planning) ka MNREDA, u Danseng M. Sangma da pynyoo ki yei myntoi wa da yoh.
Da yoh leh i klam wa bniah hajrong ka bordiñ wa mih na ka sngi (Solar Energy) yeiwa da pynche da u Assistant Director (SOLAR) na MNREDA, u Rafikul Islamheiwa uwa da ong u wa ka chnat yong oo ka New and Renewable Energy ka sorkar pyrdi chirup wa ka MNREDA booh thong ki wow pynpoi bordiñ wa mynkna wei wow pynchlur wow pynemkaam ya ka ha ka jylla Meghalaya.
