Guwahati: Uwa yahkhmat ka All India United Democratic Front uwa man leh u Lok Sabha MP u Badruddin Ajmal da beiñ joor u yaka National Register of Citizens deiwa kam wa ka sorkar pyrdi da pyrchang ki wow pyndooh jait noh ya ki Muslim napoh ka ri.
“Ka NRC da man ko kawa syad dor bha yaka ri, da pynsepai yei por yong kiwa boon ki sahep wei ha iwi i liang da pynchitom ya kiwa boon ki bru wow pynsakhiat yei long i man yong ki. Kwah ki wow pynsakhiat wa ki Assamese Muslims toh ki nong Bangladesh. Waroh iwa leh ki sepai i. Tih ki ya uwi u loom tangwa chem ki da i khne wa yap,” ong u Ajmal.
Da ong u leh wa ym em sñiaw em kyrmen u naka sorkar BJP wa em ha Delhi. “I ym em sñiaw i wa em kyrmen naka BJP. I thmu yong ki hi toh wow pynmih noh ya ki Muslim waroh wa em hapoh ka ri. Ym em khuslai ware i yei klam u Amit Shah. Tangwa man ko kawa ym yahap wa u Home Minister ym booh u yaki Muslims haka NRC waka CAB (Citizenship Amendment Bill).”
U MP ka Dhubri da ong chooh chooh u wa ka BJP wa synchaar katni u lai ko chakhmat waka NRC du wow “phiah” donhi.
“Waroh man ko ka kaam Politics wei ki tip ki yeini. Ym jooh em wa pynkrehkaam yaka NRC, tangwa da leh ya ini yow phiah. Lada em kiwa man ki bru kiwa na baar ka sorkar toh u kdaw ko ya kini, u Amit Shah da tyngkheiñ u yaka Constitution hawa e u yei klam yong oo wei ini man ko i wym toh iwa miat,” da ong u Ajmal.
U Union Home Minister Amit Shah ha kani ka tayaw da pynbna u wa yaka NRC daw pynkrehkaam yaka hapoh waroh kawi ka ri wei waroh kiwa em hapoh ka ri u embynta ki ha ini deiwa khlem kheiñ yaka niam. “Ka NRC toh kawa pait daka Supreme Court. Ym em mang ya kawon kawon ka niam heipor wa leh yaka NRC,” ong u Shah.
Discussion about this post