Jowai : Ka yakop kynjet bol yong ki khynnah hapoh 12 snem i rta ya kawa da tip kam ka Under 12 Football Tournament da poi ko cha wa kut ynne ka 26 tarik kam chi bynta i lehkmen Republic Day.
Da sdang ya kani ka lympung yalehke bol nadooh ka 22 tarik uni hi u bnai wei da wan chimbynta hadooh 15 tylli ki dhab haka rukom yalehke Knock-out.
Ha ka phainal wa da pynkut ynne ka sngi da yaleh ha pyrdi ka Dulong SC Vs Iongpiah SC ha madan Kiang Nangbah Stadium heiwa da pynemkaam du chiteiñ ka madan na chrooh cha chrooh mar 30 minit chi kylla.
Ha ka kylla step ka Dulong da sdang ko deiwa khlan bha heiwa ka bol da neh ko du chiteiñ madan don hi tangwa kattæ leh hadooh wa kut ka kylla step ym ye ko u pynkhih ya ka jar ki Iongpiah na kiwa boon ki kabu wa yoh ki.
Ka kylla miet leh man ko kamjooh hi tang wa ha ka minit wa 42 u Tremi Lamurong da thap u ya ka kool wa nyngkong ka Dulong pynbood sa u Sahame Lyngdoh ha ka minit wa 45 katwa u Diangmon Kyndiah da thap u ar sein ha ka minit wa 55 wa ka 57.
Da kini ki kool ka Dulong da jop ko ya ka phainal da 4-0 ya ka Iongpiah.
Discussion about this post