I kreh ka Meghalaya Cricket Association (MCA) wow pynmiat ya ka madan yaleh Cricket ha Polo da sdang mih soh i heiwa u heh ka BCCI, u Ashish Bhowmick da yaroh u ya ka heiwa ka Pitch man ko kawi na kiwa miat dooh ha India.
Ha kani ka samoi yaleh Cricket ha India ha u 2022-23, da em kani ka madan hapoh i pait ka BCCI, heiwa da bood ya ki kyndon wa toh u man ki madan.
Ka MCA da kreh chitom bha ko wow pynmiat ya kani ka madan deiwa wanrah ya i khyndaw thymme kamjooh u jait phlang wa kyrpang nadooh chwa ka khlam COVID-19 dei kyrchaan ka BCCI.
U Ashish Bhowmick da yaroh u wa da boon i kylla nadooh wa wan khaddooh u chwa ka khlam COVID-19 deiwa wa ong ym toh iwa suk wow sumaar ya ki madan ka thaaiñ mihsngi neidaw wa joor u slap wei duna ka sngi.
Da e buit u leh kammon wow pynmiat ya ki talawiar ka madan wei da ong u wa ka Alotgre Ground ha Tura kawa daw pynman ya ka Tournament ka BCCI hei sien wa nyngkong dang em iwa emkaam wow chna pynmiat ya ka.
Neiliang u President u MCA, u Naba Bhattacharjee da ong u wa ka seiñ daw rah ko ya u phlang wa boonjait wow pyrchang u thung ha ka madan.
Hanla ya kani ka madan da pait da ka MCA, da yaleh ko wow bood ya ki kyndon wa da booh da ka BCCI, da ong u Bhattacharjee .
U Honorary Secretary ka MCA, u Gideon Kharkongor da e khublei u ya u Bhowmick wa da pynlait por u wow wan cha Meghalaya wei da kyrmen u wa ki madan ha Shillong wa Tura daw ye u pynman yalehke da ka BCCI.
