Da: U Lektor Dkhar, Khliehmyntriang East Jaintia Hills District
Ka por kala dei ban saiñdur thymmai iaki jingmut jingpyrkhat jong ngi ha man uwei pa u wei u briew. Ka Elekshon jied nongmihkhmat sha ka iing dorbar thaw aiñ kala jan te kumta nga kwah ban kyntu ia ki paidbah nongshong shnong jong ka 6-Khliehriat Constituency ba ki dei ban pyrkhat jngai bad ban pyrkhat janai hashwa ban jied nongthaw aiñ khnang ba kan ym don kano kano ka jing babe hadien habud.
Ngi dei ban jied ia u nongthaw aiñ uba don ka jingmut jingpyrkhat kaba iar bad da uba don ka jingkitkhlieh na ka bynta ka Constituency jong ngi bad iaka jaitbynriew hi baroh kawei.
Ngi dei ban jied bad ban kyrshan ia uba don ka jingnang jingstad (Educated Person) uba lah ban iakren bad ban iasait iaki jingeh jingjynjar jong ngi ki paidbah hapoh ka iing dorbar thaw aiñ ka jylla bad da u ba lah ban wanrah shibun ki kam pynroi hapoh ka Constituency, da u bym arsap bad u bym leh shiliang hapoh ka imlang sahlang, bad khamtam hapoh ka District jong ngi dang bun ki jingduna ba ki MLA lane ki Ex-MLA kim pat pyndep.
Khamtam eh kat ka East Jaintia Hills District kam pat don Government College kane ka buh jingeh shibun ia ki paitbah jong ngi. Kumjuh ruh ki don shibun ki riew donsap ki khun samla jong ngi napoh kane ka thaiñ naduh ki kam Sports, shna Film, nongrwai bad kiba Pass ha ki kyrdan bapher bapher ki long lehnoh ei namar ngim pat ioh nongmihkhmat da kiba pyrkhat shaphang kane, kumjuh ruh ba baroh ngi kwah ban ioh iaki surok ba biang ha baroh kawei ka District jong ngi.
Kumta nga kyrpad ia ki rangbah ki longkmie ki samla ba kim dei ban pynlong Business ia kane ka kam jied nongmihkhmat khnang ba kan long ka jingmyntoi ia nga ia phi bad ia ka Constituency jong ngi hi baroh kawei bad khamtam eh ki paidbah jong ngi kiba im ja kpoh na u dewiong ka buh jingeh shibun ia ngi lada khang dewiong.
Ngim dei ban jied nongmihkhmat da u bym lah bad bym treh ban ia kren bad ban iasaid na ka bynta ka ja kpoh jong ngi namar u dewiong u long uba kynsai tam ia ngi kiba shong ba sah sha kane ka thaiñ, kumjuh ruh ngi kwah ban ioh ia u nongmihkhmat u bym dei u niang kohnguh jong kiwei lane u niang kohnguh jong ki Businessmen.
Khatduh khatwai ka rai ka shong ha ngi ki paidbah ba iano ngin jied ia uba rim ne uba thymmai, sa ia bishar hi ma phi ki paitbah baieid jong ngi.
