Jowai: Wow wanrah yei ryngkat kyrdan hapyrdi i manbru kamjooh wow yoh yei tip wow thoh u puræ wa salonsar khlem da em i ñiaw chilliangkhmat hapyrdi ki khynnah, yoohkjat ki bru ka National Institute for the Empowerment of Person with Intellectual Disabilities ha Jowai neibynta wow pynman ya ka prokram e sikai kyrpang ya ki manbei manpa yong ki khynnah wa em hapyrdi i duna, tymbuiñ hei man rynyieñ rynyiot.
Ya kani ka prokram da pynman ha West Jaiñtia Hills District ha kani ka 21 u Naikhynde ha DC Office Conference Hall dei yakrehkam ha pyrdi ka Office of the Commissioner for Persons with Disabilities, Shillong wa ka Office of the District Mission Coordinator, Sarva Shiksha Abhiyan, West Jaiñtia Hills District.
Ha ka yalang yahkhmat dayoh yei klam na ka kong B. Warshnong Asst. Commissioner for Person with Disabilities, Shillong wa na u R.C. Nitinaware, Officer Incharge Regional Centre NIEPID, Kolkatta katwa u ma L.K. Singh, District Coordinator Inclusive Education, SSA-West Jaiñtia Hills da e u ki kyntien khublei ha ka bynta wakut.
U Deputy Commissioner, u Arun Kumar Kembhavi hei pachat ya ki kyntien kam u kongsan da kdar u wow booh chiboon ki nongmuna yong ki bru wa em hapyrdi i duna tymbuiñ hei man rynyirñ rynyiot kiwa man kam ka khubor wow e mynsien ya ki manbei manpa.
Ki bru wa stat bru chemphang na ka National institute for the Empowerment of Person with Intellectual Disabilities kiwa da e i klam i batai, pynche pynsñiawthooh ki ya ki manbei manpa ha ka bynta wa ar yong kani ka prokram kam u G.N. Srinavasalu, Faculty Department of Adult Independent Living, NIEPID- Secunderabad wa ka Amrita Sahay, Officer incharge Regional Centre, NIEPID-Noida deilang wei yarap ka Magdalene Shullai, Ex-Resource Teacher, SSA-Amlarem Block.
Neiliang ki bru ka NIEPID da kyrpad ki ya ki manbei manpa wa wan ha kani ka prokram wow pynbiang, pyntoh ki ya ki kot wa emkaam khnang yow ye ki u yoh ya ki laad yarap kiwa man ha ki dur ki rukom waphær waphær.
Discussion about this post