Jowai : Ka Meghalaya State Commission for Women ynnin ka 14 tarik da pynman ki da ka Public Hearing hei yatoh wa i chah leh beiñ ki kynthai, ki manbei hadooh ki khynnah kynthai hapoh ka jylla Meghalaya wei da khutlang ya kiwa boon ki seiñbhalang wow ya embynta lang yow phyllu yumut heiyatoh wa ini.
Ha kani ka sngi ha kamra Conference DC Office, Jowai da wan kamwa 2 tylli ki seiñbhalang wa kreh neibynta ki khynthai wei neiliang ka District Legal Service Authority kiwa da yooluti wow emlang ki yow yohlaad u sñiawthooh yeidaw wa slem u e bichaar ya ki mukotduma hei yatoh wa ki kynthai ym em wan ki.
Neiliang u SP ka WJH u R. Muthu da ong u wa kat dang lai ki snem dang ku ki ujor wa chah leh bien ki kynthai heiwa ha u snem 2015 da em 63 tylli, ong u leh wa ye u em dang boon ki kaam pyrchah ya ki kynthai boi wa dam ki u wan cha khmat.
Da ong u leh wa katni wa lada i chnong wa jia ki kaam pyrchah ya ki kynthai man i iwa jngai, ye ki u phone cha ki pulit wei daw wan ki wow leh ki ya i takit wei ym emkaam u lai cha thanat (Police Station).
Neiliang ki wa kreh ka Social Welfare da pyntip ki wa ha u snem 2013-14 da em 3 tylli ki mukotduma wei da yoh yei bichaar ya ki ar tylli, ha u snem 2014-15 da em 7 tylli ki mukotduma wei da yoh bichaar ya ki 3 tylli.
Ka Chairperson ka Meghalaya State Commission for Women ka kong T. Phanbuh ong ko wa dangboon i emkaam u leh yow lait na ini i chah lehbeiñ ki kynthai khamtam i yarap Legal Aid.
U DC ka WJH da kular wa yow pynman biang sa chisien ya kam kani ka Public Hearing heiwa daw pyntikna wa daw wan boon ki wow chimbynta lang.
Discussion about this post