Ynne ka sngi ka yung krehkaam u Superintendent of Police, Jaiñtia Hills da pynman ko ya i pynsñiawthooh paidbah wa kyrpang hajrong ki aiñ kawa da e pyrtuid “Awareness on Drug Abuse, Crime against Woman and Children & Road Safety” ha Jaiñtia Eastern College, Khliehriat.
Ha kani ka sngi u Montri ka chnat Bhalang uwa man leh u MLA ka Khliehriat, u Kyrmen Shylla da man u kam u kongsan hei emlang u Abhilash Bharanwal, u Deputy Commissioner ka District wa kiwi kiwi.
Da yoh ya ki kyntien pdiang burom na u Principal ka College, u P. Nongtdu.
Ha kani ka sngi ki bru chemphang kynthup ki ya ka SI D. Shabong na ka Khliehriat Women’s Police Station kawa da batai hajrong ki aiñ wow yada ya ki kynthai wa ki khynnah kam ka POCSO heiwa da batai ko hajrong ki kaam chah thombor ki khynnah wei kammon u chah pynchitom ya ki bru.
Neiliang u Jason Mairom uwa man u DSP ka District da batai u hajrong ki aiñ wow yada hawa lai wa wan ha ki sarok namo ka Road Safety heiwa da khana u wa i yah kari dei muaid kamjooh leh i yah kari khlem akor toh iwa maa tam ya waroh. Da kyntu u leh ya waroh wow pyndait ya u Seatbelt neibhah lada jia wa em i tyrrah kari manda pyndait Seatbelt man iwa chngaaiñ bha ya kiwa chong hapoh kari.
U Additional SP, u Banraplang Jyrwa da batai u hajrong i sih hawa pynemkaam Drugs namo ka phang Drug Abuse, heiwa da khana u kajiak hajrong ki Drugs wa man pyrchah aiñ kam u Bhang, Heroin, Opium wa kiwi kiwi.
Da khana u leh ya ki aiñ wa em ha ka ri kam ka NDPS Act heiwa ki bru ye ki wow chah pynchitom lada chem ya ki wa ki Drugs wei wot ya kiwa dih Drugs leh ye u chah pynchitom ki heiwa da khana u wa chisien wa chah kem da ktah ko ya u bru chi rta.
U Kyrmen Shylla, hawa e i klam da e khublei u ya ki pulit ka District wa pynman ko ya kani ka pynsñiawthooh, heiwa da yooluti u wa kiwa chimbynta daw ye ki u khana ya kiwi hajrong iwa yoh myntoi ki neini.
Da kyntu u leh ya waroh wow pyndait ya u Seatbelt yong ki hawa yah namo chong hapoh kari neibhah wa ymtoh du wa phah ka aiñ tangwa man iwa emkaam wow man kiwa chngaaiñ. Heijooh i por da kyntu u ya ki khynnah wow kiar ki na ki jait dih wa pynmuaid kam ki Drugs neibhah nadooh wa man u kam u Montri ka chnat bhalang, da yoo u hadooh katwon ktah ki Drugs ym du ya kiwa dih tangwa kiwa hayung leh kamjooh.
U SP ka District, u Jagpal S Dhanua da kyntu u ya ki khynnah wow em i yakrehlang wa ki pulit wei wow man ki khynnah kiwa minot khnang wow poi ki cha ka thong.
Da yoh leh i klam na u DC ka District u Abhilash Baranwal uwa da khana ya i myntoi lada sap ya ki Helmet wa i pyndait ya ki Seatbelt deiwa pynrap wa hawa yah smat ya ki kari ym pynyoo i ya i chlur tangwa daw yah i cheiwa silet.
