Jowai: Yow tip wei wow pynsñiawthooh ya kiwa kreh sorkar ya i krehkaam ka aiñ Right to Information, Act 2005, ka yung krehkaam u Deputy Commissioner, West Jaintia Hills deiwa krehlang waka Meghalaya State Information Commission, ka sorkar jylla, ynne ka sngi da pynman ki yaka yalang pynsñiawthooh ha Conference Hall DC Office Jowai.
Da chimbynta ha kani ka yalang pynsñiawthooh da kiwa kreh sorkar naki chnat krehkaam waphær waphær.
Ka R.S. Manner Additional Deputy Commissioner hei klam yong ka da ong ko wa ka RTI toh ka hok wa da pynkupbor yaki paidbah wow yoh ka hok thooh yutip hajrong ki rukom krehkaam ki chnat sorkar waphær waphær khnang wow ye u wanrah yei khooid wa ki jubab wa smat hapoh i por wa da booh.
Kamtæ toh u bood katkam ki kyndon deiwa sñiawthooh ya ka yurim yong ka neibynta wow wanrah ya ka bha ka miat haka imlang sahlang.
U Deputy Commissioner wa thymme ka West Jaiñtia Hills District u C.P. Gotmare, IAS da ong u wa ka RTI hi toh kawa emkaam bha ym du wow pynmyntoi ya ki bru sorkar kamjooh ya ki bru paidbah.
Kawa emkaam ong u toh wow sñiawthooh ya ka aiñ yow ye u chim ya ka rai kawa biang wei wow pyndep yaka haka rukom wa biang katkam ka aiñ wei wow yoh leh ki hok u paidbah.
Ha i jooh por da kyntu u ya kiwa kreh sorkar wow man ki kiwa bniah ya ka kaam kreh neibhah ym ye wow tip ha iwon i por ki paidbah ye ki u paaan yutip.
Kiwi de kiwa klam pynche ha kani ka sngi hajrong ka RTI toh u F. Basan EAC West Jaiñtia wa u I. Phawa, Assistant Research Officer, District Planning Branch.
Discussion about this post