Imphal : Ha ka niaw vote yong ka Election MLA hapoh ka jylla Manipur ka Bharatiya Janata Party (BJP) da sdang ko u pynyoo bor hadien wa yoh ko u synchaar ya ka jylla Assam wei ka BJP da jop ko ha ki 21 tylli ki constituency katwa ka Congress won da jop ko 28 tylli. Kiwa sah da jop ka NPP 4 tylli, ka NPF 4 tylli ka LJP, AITC wa u wi u Independent da jop mar ka wi.
Ka Congress toh kawa da synchaar ha Manipur la 15 snem wei ha kani ka kynti da yachem ko wa BJP kawa da jan pyntam ya ka wei ha kani ka election da man ko ka sien wa nyngkong wa ka BJP da ye ko u yoh kyrchaan na ki paidbha kamni ha Manipur.
Hanlada kattæ leh ka Congress dang emlaad ko wow chna sorkar hapoh ka Manipur lada yoh ko yei kyrchaan na kiwi tawan ki seiñ hima sima. Lada ka LJP (1 Seat), AITC (1 Seat) wa u wi u Independent lai ki cha ka Congress da yoh ko u chna sorkar deiwa yoh ko 31 ki seat.
Ya ka BJP won da sah sa du 4 ngut ki kyrtong ka NPP wa 4 ngut ki kyrong ka NPF wei daw poi du 29 ngut na ki 60 ngut wow kyrchaan ya ka BJP.
Ka Irom Sharmila won kawa da chah thngan hadooh 16 snem yow pyrchah ya ka aiñ Armed Forces Special Powers Act kawa e bor ya ki chiphai wow kem ya kiwon kiwon ki bru wa suba wa man ki ki dkhot ki seiñ kieñ suloi da rem ko ha kani ka election deiwa yoh ko du 90 Vote ha ka Constituency u Chief Minister ka Manipur uwa da ksoh kam u Minister la le sien u Ibibo Singh.
Ka NOTA (None Of The Above) da tam boon ko bar ya ka vote wa da chon ha ka chaap yong ka Irom Sharmila heiwa da em hadooh 143 ngut kiwa chong ha ka. Hadien ini ka Sharmila da pynbna ko wym yaleh Election de ko.
U Ibobi da yoh u 18,649 vote wei da pynbood ya oo da u kyrtong ka BJP u L. Basant Singh uwa yoh 8,179 vote.
Kiwi de ki kyrong ha kani ka constituency toh u kyrtong ka All India Trinamool Congress u Leishnagthem Suresh Singh uwa yoh 144 vote wa u kytong samen u Akoijam Manglemjao Singh uwa yoh 66 Vote iwa mut ka Sharmila da poi ko hei kyrdan wa soo.
Discussion about this post