Shillong: Uwa yahkhmat ka Bharatiya Janata Party (BJP) uwa man leh u montri ha ka sorkar jylla, u A L Hek da ong u wa i rai wow kyrchaan ya uwon uwon u kyrtong næ party ha ka election chiteiñ samoi chong ko ha ka party.
Yeini da ong u Hek hadien wa kawa yahkhmat ka tnat manbei ka BJP ha Meghalaya, ka Pelcy Snaitang da pynsñiaw ko wow kyrchaan ya u kyrtong ka UDP, u Pius Marweiñ ha ka election chiteñ samoi ha Ranikor, wei u kyrtong ka BJP ha ka election wa dadep, u Billy Kid A Sangma won da pynsñiaw u wow kyrchaan ya u kyrtong ka NPP uwa man leh u Montri Rangbah ka jylla, u Conrad K Sangma ha ka election na South Tura.
U Hek da ong u, “Kiwon kiwon ki bru ka party ymtoh u rai ki samen wei ka Kong Pelcy da lai ware ko chakhmat. Man i iwa bakla lada ka party ympu em rai lang ko wei ymtoh u leh kamni.”
“Lada ym yakhun u leh, u Billy Kid ymye u wow lai kyrchaan hi-eh ya u kyrtong ka NPP,” da ong u Hek.
Hajrong ini i lai lait yong ki na ka party neiliang u Hek da ong u wa chong i ha ka rai ka party lada khut phah pynche ko ya ki namo wow beh seiñ ya ki chipor.
Heiyatoh wow pynyien kyrtong neibynta ka election ha Ranikor neiliang u Hek da ong u wa chong i hei stat u president ka party wow ya rai lang, hadien wa da thooh yumut na kani ka Constituency.
“Lada ka party yoh ko da u kyrtong uwa biang wei rai ko wow pynyakhun daw pynyakhun bait,” da ong u Hek deiwa pynrap leh wa neiliang yong oo samen u kyrchaan bait u ya u Danggo na Ranikor.
Discussion about this post