U Shemhok Garod, MDC warim ka JHADC naka Nangbah Constituency kam uwi napyrdi ki kyrtong wada lai luti wow yakhun ya ka Election MLA 2023 naka 3-Raliang Constituency, da ong u wa kam u MDC wada dep jop le sien, i daw wa pynman ya oo wow yakhun yaka Election MLA toh wa em sakhiat u i angnood wow chakri ya u paaid ka Constituency rap bha baar hei por wa man MDC, neibhah kani toh ka laad wa rap ye u lehbha chooh chooh.
Lyngba ini i angnood khana u wa kwah u wow pynkylla næ pynthymme i rukom krehkaam hapoh ka Constituency wa yatoh wei roi wei paar ha kiwa boon ki liang, nadooh i puræ puthi, i chait i khiah, ki luti syngkieñ neibhah kamwa man katni da hiar bha ko.
Han hapyrdi i lai luti yong oo ya kani ka kaam khana u wa mih pathan i pynbaad ya oo, iwa ong wa oo toh uwa pynyieñ da kiwi tawan namo u bru wa baam nong.
Kamtæ heiyatoh wa kini ki kyntien wa mih chawah chaneiñ, pynche u wa toh i klam pynbaad wym em yurim, weiwa kiwa klam kwah ki u pynwit donhi yei lai luti yong oo neibynta u snem 2023.
“Lada em kiwa yoo wa chem wa nga leh O kamtæ, sñiawbha wan chakhmat rah wa ki sakhi sabut wa biang, lym em won ham jooh klam beiñ næ pynbaad ya kiwi, neibhah em ka aiñ wa katkam ka IPC yong ka ri India Section wa 50 Chapter 12 yong ka Defamation Act da klam che ko lada em kiwon kiwon wa klam beiñ khlem ka yurim næ ki sakhi ye ki u chah pynchitom katkam ka aiñ,” ong u Shemhok Garod.
Kamtæ da kyrpad u ya ki paidbah wym hoi u ap ki yei pynbaad wa khlem yurim, tangwa u e bor e mynsien pura ki oo yow ye u wow pynmankaam yei angnood neibynta i bha i miat yong ki hi neidaw wa i roi i paar wa da nanghiar nanghiar i katni.
Heijooh i por kyntu u leh yaki paidbah wa lada em kiwon kiwon wa klam ki kyntien pynbaad wow sñiawbha ki u chim ‘Record’ tæ pynpoi cha oo khnang wa ka aiñ u leh ko yeiwa emkaam pyrchah ya kiwa klam beiñ pynbaad khlem yurim.
Kam u Secretary ka Party UDP naka 3-Raliang Constituency kwah u leh wa ki bor wa hakhlieh ka UDP u sñiawbha ki wow pynyoh ka Ticket yong ka Party leh cha oo, wei la jia wym yoh won u daw chong pyrkhat u deilang kiwa kyrchaan yong oo heiyatoh wow lai chakhmat.
