Ki Chief Executive Member (CEM) yong ka Khasi Hills Autonomous District Council (KHADC) wa Jaiñtia Hills Autonomous District Council (JHADC) ynne ka sngi da yoh ki wow e yumut wei leh wa ki kot ki sla kiwa emkaam neibynta i kaam ya pynbait pood wa ka Assam ha ka yalang kawa da khut da u Montri Rangbah ka jylla u Conrad K Sangma ha Secretariat.
Ha kani ka yalang da em leh ki kattu katni ki EM, ki khlieh synchaar wa kiwi kiwi kiwa yoh wow e yumut yow ye u pynlai chaaid chaaid ya ka kaam pynbait pood wa ka Assam.
Hawa klam wa ki laad pathai khubor hadien wa da wai ka yalang, u CEM ka KHADC u Titosstarwell Chyne da ong u wa ka phang wa da yaklam ha kani ka yalang toh ka jooh kawa da yaklam ha ki Regional Committee tangwa iwa sñiawsuk toh wa ha kani ka sngi neiliang ka Boundary Committee yong ka KHADC da yoh ko wow ekti ya ka bui (Report) kawa paka wow pynbha pynbiang katkam i tip wa tikna wa e cha ka sorkar jylla.
U Titos da ong u wa hawa pynbait pood, ka sorkar ka toh u lai ko katkam ka Para 20 yong ka Sixth Schedule wei ya ki thaw yong ka KHADC toh u pynskem yei kamtre yong sorkar. “I da e lut i ya ki kot ki sla kiwa da e cha i da ki Hima kiwa em ki thaw wa ya kajia pood neibhah kam ka AD Rule Form yong u snem 1952, ki chnong wa haap hapoh ka AD Rule toh ki chnong wa haap hapoh u pood u ang yong i,” da ong u CEM KHADC.
Neiliang u CEM ka JHADC u Thombor Shiwat da pynsñiaw u wa ka yalang toh kawa sñiawsuk heiwa da ye wow ya phyllu yumut yow ye u pynbait noh ya u pood u ang hapyrdi ki ar jylla.
Hawa yatoh wa ka thaaiñ Ratacherra, u Thombor da ong u, “Katkam i yoo yong ka District Council, ka Ratacherra ym toh ka thaw wa em ya kajia pood neibhah wa ki paidbah ha kitu ki thaw ki chong sah ki hapyrdi i suk i saaiñ khlem i chah pynwit næ pynthut heiwon heiwon leh wot ka Assam leh ym jooh wan tuklar ko.”
Da ong u wa toh du hadien wa da sdang yei yaklam wei pynbait pood, da mih i khih klang ya ki bynta yong ka chnong Ratacherra wa ka em ko hapyrdi i kajia pood tangwa kamwa man hi, u pood yong ka chnong Ratacherra toh bait lyngba ka wah Malidor, wei hei yong sakhiat ym em itæ i kajia pood.
Hawa yatoh wa i bynta yong ka Block-I, u CEM ka JHADC da ong u wa ha kani ka yalang ym em i yaklam iwi iwi, hanla kamtæ leh neiliang yong ka District Council ka em ko ya ki kot kiwa biang wow pynsakhiat wei wot ki Elaka kiwa em heitai i thaw ki tip bha ki.
Da ong u wa ki bru kiwa chong wa sah ha kitai ki thaw da jooh wan ki chakhmat yow pynsñiaw wa ki kwah ki wow em hapoh ka Meghalaya manda poi i por pynbait pood.
