Wahïajer: Ha kawi ka lyngkha u ma Moses Suting ynne ka sngi; ka Krishi Vigyan Kendra (KVK) da pyllait symbe dakha ko kamwa 200 tylli kam wa u pyrchang ia ka rukom rep thymme hei wa ri lang ia ki dakha ha ka lyngkha kba. Ia kani da leh ha ka chnong Wahiajer ha ka dong Loombhahdakha. Da khut ia kani ka rukuom rep ha ktien phareng kam ka Integrated Fish Farming.
I jingthmu iong ini i rukom rep toh u pynem kam ia ki dakha kam ki nognbam ia ki khniang kiwa pyniap ia u kba, ha i juh i por ia ki ait ki jakhlia wa mih na ki dakha kylla sboh ki ia u kba. Da yong phareng ong ki ka Symbiotic Relationship, kawa i wi i jingim emmkam ki ia kiwi ki jingim yow im wei u heh u san ki.
Ia kini ki dakha ym hap lut poisa u ri ne u e bam ia ki ong u ma M.J. Syngkon u wa man kam u Programme Co-ordinator ka KVK, Jaintia Hills. Da khana u wa ki warep da i stad iong ki; ki juh tan ki da ki tylle najrong ki kba iow hap ki khniang kiwa em ha u kba kiwa man won kam i bam ia ki dakha.
Ka kabu ia ki nongrep na kini ki dakha toh ye ki u dai iaki hadien soo bnai ha ki dor wa biang neibah man ki ki dakha wa dang im ymtoh kam ki dakha wa da iap da booh ha u thah kamwa boon kiwa dai cha iaw katni. Kini ki dakha leh man ki wa bha u bam neidaw ha kini ki lyngkha wa ri ia kini ki dakha ym em u siat dawai khniang (pesticides) na ki daw wa kini ki dakha ym ye ki u im dei wa siat dawai.
Ka kong D. Syiemiong, Director of Agriculture ong ko wa u pyrchang ia ini i rukom ri dakha ha boon ki thaw kamwa le snem chwa, chwa u lai cha khmat hei wa u tyrwa ia ka cha waroh ki warep. Ngeit ko leh daw man i wa jop neibha cha boon ki ri wa jan man ko ka rukom rep wa jop wa kawa iarap pynku ia ka ioh ka kot ki nongrep.
Ha ini i rukom rep hap tih ia ki rud ki lyngkha kamwa chi meter tam iow man ki thaw ympa ia ki dakha kamjuh leh i thaw im ki ha ki por pynsngat ia ki lyngkha ha ki por ah kba. Ha pyrdi ka lygkha wan hap pyllait thaw iow man kam i thaw rieh ia ki dakha. Hap ker leh ia ki lyngkha da ki jar leit ki dakha u yut lada heh um.
Discussion about this post