Ka People’s Democratic Front (PDF) da pynkhreh ko wow rah yaklam ya 3 tylli ki Policy najrong kiwi won ki phang wa rap kongsan. Ya kini ki Policy daw yaklam sani bha hadien ka Election wei daw booh leh hapoh ka kular namo ka Election Manifesto yong ka Party.
U General Secretary ka People’s Democratic Front (PDF), u Auspicious Lyngdoh Mawphlang da ong u wa kam ka seiñ kawa emlang ha ka sorkar Meghalaya Democratic Alliance (MDA), waroh da pyrchang wow ya krehlang deiwa ya sñiawthooh yumut. Da ong u wa ka Party boonsien da lai ko wow yachem ya u Montri Rangbah yow yaklam hajrong ki kaam kiwa ktah ya ki paidbah wa ya ka jylla.
Da kubur u wa ha i lai luti yong ka Party kiwa boon ki phang ym pu em da ye wow pynmankaam, ya iwa oo da pynsñiaw u yei yooluti wa lada ki paidbah e ki yei kyrchaan ya ki kyrtong ka PDF, ya kini ki phang leh daw pynmankaam.
Uwa yahkhmat ka PDF da ong u wa ka seiñ da pynkhreh bha ko ya ka Election Manifesto namo ka kular Election, wei ki phang kiwa ka Party sñiawkhia bha ko toh hajrong ka Reservation Policy ya kawa daw yaklam sani bha hadien ka Election, ka Mining Policy waka Policy chna laad yei yoh kamai yoh kreh ya kiwa ka Party da pyrkhreh ko wow yaklam najrong kiwi de ki phang.
U Auspicious da ong chooh chooh u wa hei lai luti yong ka Party ha kini ki san snem, wot hawa emlang hapoh ka sorkar, da lai wow rah ya ki phang ki wym yahaap wow pynkrehkaam ha ka jylla hakhmat u Montri Rangbah ka jylla, u Conrad K Sangma. Da ong u wa ka Party rah ko ya ka phang wa pynman kongsan ya u Aadhaar hawa pynkrehkaam ya ka Scheme PMAY, hawa yatoh wa i pynkrehkaam ya ka PDS wei kamjooh ya ki phang wa yatoh wa ka chnat bordiñ najrong ka phang wow pynkrehkaam ya ka CAA wa i wanrah ya ka pynbna namo ka Notification ha ka Environment Impact Assessment (EIA), 2020.
