Jowai : Ka yalehke Inter School Football Tournament ka wa tip leh kam ka Subroto Cup 2016 ynne ka sngi da rai ya kiwa jop ki kyrdan U-17 Boys, U-17 Girls wa ka U-14 Boys.
Ha ka yalehke U-14 Boys ka wa da yaleh ha pyrdi ka Loompyrtuh Secondary School pyrchah ya ka Marian Hill Secondary School ka Marian Hill da jop ko 2-0. Ya kini ki kool da thap da u Heibormi Suchiang ha ka minit wa 15 katwa ha ka kylla miet won da thap da u Dowell Shylla ha ka minit wa 53.
Neiliang ki kynthai ha ka kyrdan U-17 da yaleh ha pyrdi ka Government Girls’ Higher Secondary School wa ka St. Dominic Higher Secondary School heiwa da jop ka Government Girls 1-0 lyngba ka kool wa thap da ka Rapbha Chyrmang ha ka minit wa 23.
Ha ka yalehke yong ka kyrdan U-17 ka Government Boys’ Higher Secondary School da yaleh pyrchah ko ya ka North Liberty Higher Secondary School ha ka yakhun final wa yathaiñ wei wa sahkynmoo bha.
Ha ka kylla step pynar tylli ki dhab yalehke da sdang ki ya ka yalehke deiwa pachat ya ka bol cha wah cha neiñ yow thooh laad yow thap chwa ya ka kool wa nyngkong. Ha ka minit wa 32 ka North Liberty da yoh ko ya ka chut Corner heiwa da thap u Simon Suchiang deiwa head ya ka bol. Kani ka kool da neh ko hadooh wa kut ka kylla step.
Ha ka kylla miet won ka Government Boys da sdang ko u sai yei bor yong ka weiwa da ka chut corner ha ka minit wa 36 da ye ko u su kylliang ya ka chi kool kawa thap da u Belonia Lywait. Tangwa du hadien 2 minit da thap biang ka North Liberty da ka bool wa lait na ka kti u wa yang kool ka Government Boys kawa thap da u Simon Suchiang.
Ki wa yalehke ka Government Boys da pyrchang ki katwa ye ki yow pynpoi ya ka bol cha tre kool ka North Liberty tangwa ym e laad kiwa yada yong ka North Liberty ya ki.
Heiwa boon da yoo luti wa da kut ka yalehke wei u jop ka North Liberty neibhah sah sa du chi minit sah ka yalehke. Ha kani ka minit ka Government Boys da yoh ko ya ka laad wa khaddooh u su ya ka kool deiwa yoh ko ya ka chut corner.
Ha kani ka chut corner ka Government Boys da yoh ko u thap ya ka kool lyngba u Kermi Shylla ha ka minit wa 63. Kamtæ ya ka yalehke da pteiñ da ka extra time heiwa ym em wa ye u pyntam ya ki kool wa neh 2-2.
Da rai ya kiwa jop da ka chut tie breaker kawa man leh kawa yathaiñ bha.
Da chut nyngkong da ka North Liberty heiwa ka bol lai ko sak ha kool. Ka Government Boys leh da leh ko kamjooh.
Ha ka yachut wa ar ka North Liberty wa ka Government pynar da yathap biang ki.
Ha ka yachut wa le won ka North Liberty chut ko cha rood katwa u wa yang kool ka North Liberty won da khanglaad u yei chut ka Government Boys.
Ha ka yachut wa soo won ka North Liberty da thap ko deiwa suk katwa ka Government Boys won da khanglaad biang u wa yang kool ka North Liberty.
Ha ka yachut wa san won ka North Liberty won da khanglaad won u wa yang kool ka Government Boys ya ka katwa ka Government Boys da thap kool ko.
Ha ka yachut wa ynru won ka North Liberty thap ko ya ki kool ko kamjooh leh ka Government Boys.
Ha ka yachut wa ynñiaw ka North da chut ko cha rood katwa ka Government Boys won da ye ko u thap kool.
Kamtæ ka Government Boys da jop ko da 5-4 kool.
Discussion about this post