Ynne ka sngi ka National Law School University Demand Committee da pynman ko ya ka yalang paidbah ha Tpep Pale, Jowai hajrong i dawa wow booh ya ka National Law School ha Ri-loom Jaiñtia heiwa da wan chimbynta ha kani ka yalang da ki bru samen, ki muktiar wa ki seiñbhalang wa kynthup ya ka JSU, FKJGP, JYF, KSU Jaiñtia Hills, Synjuk ki Waheh Chnong Jowai, Synjuk ki Waheh Chnong Jaiñtia Hills wa kiwi kiwi.
“I lehkmen donhi yei dap snem ka ri wa ka jylla tangwa ka Ri-loom Jaiñtia won man ko kawa chah iehbeiñ bha ha ka sorkar heiwa da chah kyntait ko ya ki thaw puræ wa kynsai tam namo ki School of Importance wei kani ka kynti man ko ka laad wow dawa noh ya ka National Law School University,” da ong u President ka Society for Study of Law (SFSL), u R. Lamar.
Da kdaw u leh ya ki muktiar wa pawnaam ka jylla katwa kamtæ ka Ri-loom Jaiñtia da pynmih ko ya kiwa boon ki khloor wa pliah ya ka aiñ wei katni man ko kawa da emkaam bha wow yoh ya kani ka thaw sikai ya ki muktiar.
Neiliang u JM Pohshngap uwa man u dkhot ka SFSL da khana u ya ki daw wa ki kaam kammon wei neiyi i daw wow ye u sdang ya kani ka skurbah ha Ri-loom Jaiñtia.
Neiliang u Ricky Shylla na ka FKJGP da ong u wa yaamrem wow sñiaw wa i toh na Ri-loom Jaiñtia neibhah waroh ki myntoi da rah cha Ri-loom Garo wei ini ymtoh neidaw kiwa mihkhmat tangwa toh neidaw yong i ki paidbah hi.
U A. Lypon, u President ka Synjuk ki Waheh Chnong Jaiñtia Hills hawa e yei klam da ong u wa yow krum u thied thaw puræ cha baar hawa em ka laad wow yoh yei stat pyn heini.
U Secretary ka Synjuk ki Waheh Chnong Jowai, u Riquoma RQ Laloo hawa e yei klam da e khublei u ya ka SFSL wa da sdang ko ya ka Khadar Dolloi Law College nadooh u 1986 heiwa da pynmih ko chiboon ki muktiar wei dei wow em ka skurbah daw myntoi chiboon ki khynnah na Ri-loom Jaiñtia.
Da ong u wa i ha Jaiñtia yoobeiñ i pyn da-i ya-i hi heiwa ynne yooluti u wow khynñia ka Yungwalieh ka Tpep Pale, tangwa duna won kiwa chimbynta wei da kyrpaad u ya ki paaid ka thaaiñ wow e mynsien ya kiwa yahkhmat ka seiñ khnang wow man ini i kaam iwa jop.
U T. Suchen uwa man u Secretary ka JSU da pynkynmoo u wa ha ka sorkar warim, ka Shillong wa ka Tura da jied ko wow pynman ya ka National Games pynyoo i yeiwa chah kyntait ka Ri-loom Jaiñtia tangwa deiwa chimkhia ka WJDSA wa ka JSU kyrmen wa ini i kaam u man i iwa jop kattu wei ngait skem u leh wa i dawa ya kani ka skurbah u man i iwa jop.
Kiwi kiwa da klam ha kani ka sngi kynthup ki ya u PS Phawa na ka JSM wa kiwi kiwi.
Ha kani ka sngi da pyntip leh wow pynman ya ka yalang paidbah neibynta ini i kaam ha Khliehriat wa ha Amlarem wei hadien kini ki yalang daw chim ya ki rai kammon u ye wow lai chaphrang wa i kaam.
Da rai leh wow e da ka dorkhat cha u Montri Rangbah ka jylla wa cha u Lat heiwa daw soi ya ka leh da ki seiñbhalang ka Ri-loom Jaiñtia.
