Ka Jaiñtia Students Movement-Central Body ynne ka sngi da pynkup burom ko ya ki khynroo khyllood wa lai puræ wa poi chakhmat hei kyrdan puræ waphær waphær ha ka yalang wa da pynman ha yungwalieh ka Tpep Pale, Jowai wada emlang leh u Lahkmen Rymbui, Montri ka chnat puræ puthi ka sorkar jylla, u L.S. Lyngdoh, Joint Director of School Education & Literacy, West Jaiñtia Hills, ki dkhot ka JSM, kiwa yahkhmat naki seiñbhalang waphær waphær wa kiwi de.
Yeini i pynkup burom da tip kam ka 4th Academic Excellence Award neibynta kiwa da lehbha ha ka SSLC, HSSLC, Graduation deiwa yoh 80% chaneiñ.
U President JSM Central Body, u Lenning Star Rymbai ha kani ka sngi da khlam u heiyatoh i man i long ka puræ puthi hapoh ka District, wei kamwa ka puræ puthi, stat i tip toh kawi ka bynta wa kongsan i roi i paar ka imlang sahlang, da pynkynmoo u leh yei lai luti ka seiñ heiyatoh i dawa pynyoh College sorkar ha East Jaiñtia khnang yow lait ware ka Kiang Nangbah Govt College ha Jowai nei khynnia.
U L.S.Lyngdoh, da e yaroh u yaka JSM wa chim ko kam kani ka luti wow pynchlur chooh chooh ya ki khynroo khyllood. Heiwa da kyntu u leh ya ki khynnah skur wow nang lehbha chooh chooh ki chaphrang khlem randien hanla maad yei eh neibhah i jop yong ki man leh ka burom yaka yung ka sem ka chnong waka imlang sahlang.
Neiliang u kongsan, u Lahkmen Rymbui hawa e yei klam ong u ya ki khynnah wa i poi chakhmat yong ki ha ki Exam ym pu em kut i, wei teiñ teiñ yoo u ki khynnah khynroo hei sñiaw stat jooh pynsepai ki yei manbru wa hadien wa da lebha heithaw u nangpyn-eh chooh chooh da leh pynjem pathan.
Ong haroh u wa hei im yong i katni toh u nang thooh yutip chooh chooh ha iwon iwon i bynta, wei ka laad em ko chiboon tangwa du kitu wa em mon u kreh chitom u lai lyngba i eh wa boonjait yow yoh yei jop.
Neitæ da ong u wa i hok ki paidbah em i deilang i kitkhlieh, emkaam u chim yei kitkhlieh, i mynsien u bichaar, wei kawon kawon ka sorkar ym kwah ko wow yoobeiñ yei hok ki paidbah tangwa hap ko wow bichaar.
Heiyatoh won wei dawa ka JSM wow pynyoh College sorkar ha East Jaiñtia Hills, neiliang u Lahkmen ong u wa ka Ri-loom Jaintia toh kawa embhah tam neibhah da ye ko yoh 3 tylli ki People’s College, wei i lut ym duna ya T. 10 klur ha chi snem.
Ong u man-i-por yaklam i du yaka Kiang Nangbah College tangwa emkaam u pynkrai wot cha palatsor wei hapoh Jaiñtia sñiawkmen wa lyngba ki Balang, ki bor chnong, ki bru samen da yoo yei ku ki College. Napyrdi 8 tylli ki College wa em hapoh Ri-loom Jaiñtia kawi toh ka College sorkar, 3 tylli ki People’s College wei ka Thomas Jones Synod College leh kawa daw yoh yarap khian naka sorkar ha kini ki kajiak bnai wow wan.
Chooh chooh sñiawkmen u wa neiliang ka sorkar ha u 2020 lyngba ka chnat kaam Pohyung da rai ko u booh Police Outpost ha Barato wei ka mang poisa ya kani leh dang lai ko chakhmat yow ye u sdang noh.
Ha kani ka sngi chim u leh ka laad wow pynche yei daw wa slem u wai yaka B.Ed College ha Jowai deiwa ong i slem toh wa kylla ki Policy ka sorkar pyrdi iwa hap u pynbiang.
Kiwi won wa e i klam kynthup ya u u S. Lyngdoh, President EJNC, Central Body, u Jersom Shylla, President JSU Central Body, u Wanbun Dkhar, General Secretary, HITO Central Body wa kiwi kiwi.
Ya ka yalang da pynlai da u Jimmy Kharmuti, Working President JSM, Central Body wei da yoh i klam pdiang na u Nathan Ribok Biam, President JSM Western Region wa i klam yahkhmat na u Heyboyme Myrphet, Education Secretary JSM Central Body.
