Jowai: U P.N. Syiem, CEM ka Khasi Hills Autonomous District Council haka 9 tarik da wan u cha ha Jowai wow yalap wei wow pynsñiawthooh ya ki daw wa mih i eh i khoo wa yachem ki paidbah wa ka jaitbru katni hapoh jylla.
Ya ka yalang da pynman ha Yungwalieh ka Tpep Pale heiwa da wan da ki paidbah wa ki dkhot ki seiñ waphær waphær.
U Syiem hawa e i klam da ong u wa ka Ri Khasi Jaiñtia ha kini ki sngi da hiar ko liang wanang, nadooh i yoh i kot, i stat i tip khamtam hapoh ri-loom Jaiñtia nadooh wa khang u tih mooyong ka NGT tangwa ym em uwi wot leh uwa mihkhmat uwa klam hei yatoh wa ini.
Da ong u wa kam u bru uwa em ha i chakri paidbah toh i kaamram yong oo wow pynsñiawthooh wa kammon u ye ki u pynwiar ini i eh i khoo wa yachem ki deiwa jied sakhiat ya ki bru kiwa em i mynsien sñiawkhia wow chakri ya ka jaitbru.
Chooh chooh da pynksan u yeiwa emkaam u chna wei wow booh da ki policy krehkaam kiwa che wa ki aiñ kiwa ye u pynsuk yaki paidbah.
Da ong u leh wa kam ki bru wa khian paaid kiwa haap hapoh ki Schedule Tribe Area emkaam bha wow pynneh pynsah yei rukom man kyrpang yong ki khnang wow pynneh pynsah yei rukom im yong ki nadooh i mantre ya ki khyndaw u chyiap, ki mar pohkhyndaw, ki riti dustur deiwa chna ya ki aiñ wa skhem neibhah ka Sixth Schedule da e bor kawa kyrpang wow yada yei mantre ya ki khyndaw wa ki chyiap kamjooh leh ya ka dustur riti yow lait ko u wiar noh.
“I sniawthooh i wa heini em arjait ki khyndaw ka wi toh ka 25 Khasi State wa ka British Territories tangwa ha u snem 1983 neiliang u Deputy Commissioner wa SDO Civil Sub-division ki da e ki ya ka Saitsohpen, Sohra cha ki phareng wei ini daw ktah joor ko ya ki paidbah wa ya ka ri-loom Jaintia neibhah waroh hap ko hapoh ka British Territories. Kamtæ sñiaw O wa toh i kaamram kiwa mihkhmat neini wow sñiawthooh wei wow pyntip wa ka khyndaw British toh ka khyndaw sorkar wei da toh u pyndooh pyndam noh ya ka.” da ong u P.N. Syiem.
Kamtæ da ong u wa lada kam ki paidbah kiwa em ka hok wow jied ya kiwa mihkhmat emkaam wow bichaar deimiat neibynta wow pynman ya ka mynried kawa suk chwa wow dooh yei hok mantre yong i.
Discussion about this post