Shillong: Ka rong pynyoo naam ya ki dur yong ki warikor wa dang pynpliah ha ka chlemsikai yong ka Riti Academy da pynman ha Mad Gallery Umsohsun, Shillong heiwa kamwa 90 tylli ki dur da boohnaam wei da thohdur da kamwa 20 ngut ki khynnah wa khynroo wa kynthup ya kiwa sikai yong ki u Skhemlang Hynñiewta wa Teisuk Chyne.
Da wai padbah yaka da u kaitor wa pawnaam ka ri u Rewben Mashangva hei emlang u N Munish Singh, Director, Indian Council for Cultural Relations, Shillong (ICCR) wa ka Dr. Madeline Yvonne Tham, Convenor, Indian National Trust for Art and Cultural Heritage, Meghalaya Chapter (INTACH).
Ha i klam yong u kongsan, u Rewben Mashangva da ban joor u hajrong i emkaam wow kyntu ya ki khynnah nongkyndong kiwa em sap wa kiwa pliah ha ki kaam yong ki deiwa ong, “I emkaam i wow pynneh yaka dak kjat yong ki warim kiwa man ki nongmuna ya kiwa boodien neibynta ka mynried yong ki.”
U Director yong ka ICCR, u N Munish Singh da yaroh u chiboon ya ka Riti Academy wei oo leh da mynjur u yeiwa ong u Rewben Mashangba wa emkaam wow pynchlur chooh chooh ya ki khynnah wa khynroo yong ka jylla ha waroh ki kaam katkam ki sap. U N Munish Singh da pynbna u leh wow yarap poisa cha ka Riti Academy neibynta ki kaam wow pynku ya iwa emkaam kani ka chlem e sikai.
Ki kattu katni na ki khynnah wa khynroo wa da rap pliah na ka kynhun yong ka Riti Academy kiwa da pynyoo rong ya ki kaam yong ki toh u Denis Marbañiang, Baiamonlang Marngar, Aruna Thapa, Susan Marbañiang wa Fasterfield Ryntathiang.
Ka Convenor yong ka INTACH, ka Dr. Madeline Y Tham leh da e ko yei klam yong ka katwa uwa sikai, u Ariopagos Manner da e khublei u ya waroh kiwa da emkti wow pynman ya kani ka kaam kawa jop.
Iwa rap pynsahkynmoo ya kani ka sngi wai toh i put chawiang u kongsan u Rewben Mashangva.
Ka rong pynyoo naam u pteiñ ko hadooh ka 30 tarik uni u bnai kawa man leh ka lyngkhooh sngikha yong ka Crystal Gayle Kharnaïor, heiwa ya kani ka khusnam da booh naam yow pynku ya ki sap dro hapoh ka jylla.
Discussion about this post