Ka 5th Kyrmen Shylla Contribution Trophy wa tip leh kam ka Super Division 2025 ka East Jaintia Hills District Football Association (EJHDFA) dapoi ko cha wakut ynne da ka yakhun Final hapyrdi ka Sutnga SCCC wa ka Rymbai Shkenshynriah.
Ka Shkenshynriah da yoh ko ya ka kool nyngkong kawa da thap bakla da uwa yalehke ka Sutnga, u Diligent Pdang ha ka minit wa 43. Kani ka kool da neh ko hadooh wa jan kut heiwa ka Sutnga da yoh ko wow su kylliang ha ka minit wa 90+3 lyngba u Coming Dkhar.
Ka yalehke da pteiñ ko da ka Additional Extra Time tangwa ym em de wa yoh u thap kool, kamtæ da pynman da ka yachut Tie-Breaker heiwa ka Shkhenshynriah da jop ko da 3-1 yow man kam ka Super Division Champion uni u snem 2025.
Ka Shkenshynriah kam ka Champion da yoh ko ya ka song poisa wa Rs. 1,20,000 katwa ka Sutnga da yoh ko Rs. 80,000.
Yei naam Best Team da yoh ka Shilliang Umshong, yei naam Goalkeeper of the Tournament da yoh u Yoomeki Dkhar (Shillang Umshnong), yei naam Player of the Match da yoh u Skillful Tariang na ka R. Shkenshynriah, yei naam Player of the Tournament da yoh u Amorrous Lyngdoh na ka Sutnga katwa yei naam Top Scorer da yoh u Ribiang Dkhar na ka Shkenshynriah uwa da yoh u thap 9 tylli ki kool.
Da wan wow sakhi ya kani ka yakhun Final da u Montri ka chnat Sports & Youth Affairs, u Wailadmiki Shylla, u MLA ka thaaiñ, u Kyrmen Shylla wa kiwi de.
Neiliang ka Jowai Co-Operative Urban Bank Ltd da e sñiawbha ko da ka song poisa wa Rs. 50,000 kam chibynta i lehkmen yei dap 50 snem ka Bank.
Discussion about this post