Jowai : Ka Shangpung Film Festival namo ka tamasa pynyoo phlim wa da pynman da ka Kiri Daloi Native Cultural Institute ha Seiñ Tyllilang Auditorium, Shangpung Pohshnong da wan ko kawa jop heiwa da ki spah ngut ki paidbah da wan ki u sakhi ya ki phlim wa pynyoo paidbah ynne ka sngi.
Kani ka tamasa pynyoo phlim da man ko kawa phær bha na kiwi ki ‘Film Festival’ neibhah ki wa pyllai ya ka ym em yoh yarap poisa ki neiwon niewon wei ki wa kit khlieh u pynman ya ka dei mon sñiawbha yong ki kamjooh leh ya ki wa wan peitke ym em haap ki u su chi suka leh.
U ma Heibormi Sungoh kam u wi na ki nongpynlai hei klam yong oo hawa kut kani ka tamasa da ong u wa da pynman ya kani ka pynyoo phlim khlem em chi tyngka leh wei da pynkut ya ka leh khlem yoh nong chi tyngka.
Da ong u ma Sungoh wa i thmu wa knongsan ha ka kani ka sien wa nyngkong toh u pynneh pynsah ya ka riti dustur ki bru ka chnong deiwa yoh ki u yoo ya ki nuksa wa da pynyoo ki phlim heiwa katwon emkaam u pynneh pynsah yei warim wa da em ha ki jaitbru yong i.
Ka wi na kini ki phlim documentary wa da pynyoo ha kani ka sngi toh ka wa da riñ ha Shangpung hi kawa pynyoo yei lehniam ‘Ku Yung’ wa ka rukom pyndep ya ka ‘La Heh.’
Ha kani ka phlim wa riñ ha Shangpung da chem wa ha pyrdi i leh ñiam ‘Ku Yung’ da em leh i rwai wa i chad wa khut pyrtuit ki ‘La Heh’ heiwa ki paidbah wa wan pynchongchit ya kani ka ‘Ku Yung’ da skit ki talawiar i diñ wei da rwai ki deiwa chna ya ki kyntein (improvisation).
Katwa sa kawi ka phlim wa riñ ha Syndai won da chem wa da mylliñ ki bru yei chaad i rwai ya ka ‘Long Hai’ kawa jooh pynman ha ki por rep thiat. Ki nongchong chnong dei sikai kawi ka men ka wa pyrtuid ka Syngkor Pohplet da sdang biang ki u pynim ya kani ka ‘Long Hai’
Da pynyoo leh sa ya kawi ka phlim wa riñ ha Umpohwin hapoh ka Raij Nongtun ha Ri-Bhoi yei rukom im kiwa rep ha katai ka chnong wa ki rwai wa pynemkaam ki yow pynwyrngai yei im yong ki ha pyrdi i eh wa chem ki hei khih i khan kamjooh leh hei rukom im yong ki ha yung ha sem.
Da em leh ka wi ka phlim wa riñ ha Ri-loom Garo kawa pynyoo ya ki arngut chi kurim kiwa dang ye u rwai wei u tem ya ki sur warim kamjooh leh ya ki tiar tem wa ym em de wa tip u pynemkaam ya ki.
Hei yoh yaklam wa u Director kini ki phlim u Tarun Bhartiya da ong u wa kam u nong chna phlim katwon dap u dei mynsien wa kmen wa yoh u kam kani ka laad u wan biang cha Shangpung yow yoh ki paidbah u bichar ya ka phlim wa riñ ha chong ki kamjooh leh dap u dei mynsien wa sniawngooh ya ka Kiri Daloi Native Cultural Institute wa ye ko u pynman kam ya kani ka ‘Film Festival’ ka wa hei rta u ym pu em jooh yoh u yoo heiwa khlem em poisa da ye u pynman ya ka kawa jop. Neibhah kam wa jooh chem u da jooh pynlut da ki lak tyngka tangwa kiwa wan peitke du arphaw lephaw ngut donhi.
Ha kani ka sngi ka Kiri Daloi Native Cultural Institute da saam ko ya ki certificate cha ki le ngut ki nongchna phlim ka chnong Shangpung kam ka dak wow pynchlur ya ki ha ki kaam wa da leh ki. Kitæ toh u ma Dapbiang Suiam, u ma Heiniwan Langstang wa u ma Snarbok Iakai.
Discussion about this post