Jowai : Ynne ka 15 tarik tarik toh ka sngi wa tip kam ka World Consumer Rights Day næ ka sngi yong kiwa thied, hajrong ka phang ‘Consumer Rights in the Digital World’ wei da leh warom ya kani ka sngi ha Conference Room ka yungkrehkaam u Deputy Commissioner ka West Jaiñtia Hills, Jowai heiwa da emlang ki Waheh Chnong, ki khynnah skur, ki seiñbhalang wa kiwi kiwi.
U ADC ka West Jaiñtia u D.M. Wallang da man u kam u chongknor, wei hei klam lamkhmat da pyntip u wa ya kani ka sngi nyngkong da kynmoo warom ha ka ri USA ha u snem 1983 heipor wa man u John F. Kennedy kam u President kani ka ri.
Da yoh yei batai ya ki jait chakri kiwa ka State Bank of India e ko ya ki paidbah, ya kiwa da batai ya ki Online Payment, ki State Bank Anywhere, State Bank Mingle, MobiCash, wa kiwi kiwi na uwa kreh yong kani ka Bank.
Ka khynnah skur ka North Liberty Higher Secondary School, ka Aidamon Talang da batai ko chaphang ka phang ‘Consumer Rights in Digital Age’ næ i hok ki paidbah kam kiwa thied mar ha ka juk kawa katni. Da ong ko wa kam kiwa thied mar emkaam wow em ki aiñ wa ki seiñ wow yada ya i hok kiwa thied mar heiwa da batai ko leh chaphang ki kyndon aiñ wa ki hok kiwa ye kiwa thied mar u pynemkaam.
Heijooh i por hajrong kani ka phang da yoh leh yei klam na u Rev. H.H. Mohrmen heiwa da ong u wa boon hi na i ymtip i ya ka hok ka yong i wei da ong u wa boonsien manda lai cha Bank ong ki wym em internet tæ emkaam wa katni u krehkaam ki internet khlem thut lada ya klam i chaphang ka Digital Age.
U Kunal Marbaniang uwa man kam u Deputy Manager yong ka United Bank of India, Jowai Branch da batai u wa ka Bank yong oo em ko du le tylli ki jait kaam ki wow pynsuk ya ki paidbah kitæ toh ka E-passbook, ka Internet Banking wa ka Mobile Banking.
U DC ka West Jaiñtia u R. Rapthap hei klam da ong u emkaam u tip i chaphang ki hok ki yong i kam kiwa thied. Da ong u leh wa kam ki bru pynemkaam i ya ki tiar nadooh wa kha, wei ymtoh u krehkaam ko du hei thied tiar tangwa hei chakri (services) leh.
“Ym hoi u leh pahooh i neibhah wa boon iwa noh i bar ya iwa pynemkaam i katwa em won ki wym yoh tang u pynemkaam leh, tæ toh u em i kaamram wow bahkhlieh yeiwa leh i” da ong u Rapthap.
Da kyntu u leh wa emkaam u paan i ya ki receipt næ ki Cash Memo hawa thied tiar yow pynsabut ya iwa thied lada emkaam hadien.
Da pynkut ya ka yalang da ki kyntien e khublei na u M.R.F. Wansweth uwa man kam u Inspector of Supply na ka Amlarem Sub-Division.
Discussion about this post