Shillong: I e naam Smart City wow yoh kyrdan ka sor Shillong kam kawi na kiwa khooid dooh em boon ki daw tangwa kawi na ki daw toh wa ha sor Shillong ki paidbah ym ap ki yeiwa ong kiwa pait mo ki Ward Commissioner.
Katkam ka khubor na ka tnat pynroi ka sorkar jylla, da pyntip wa ka sor Shillong toh kawi na ki sorbah wa ka sorkar jylla da jied ko wow lai yakhun wow yoh ya ka Scheme Smart City, katni em ko ha ka kyrdan wa 276 napyrdi ki 500 tylli ki sorbah ha ka ri wei yeini da leh hadien wa wan sylli ki bru na ka Swacch Bharat Misson na Delhi.
U heh sorkar kani ka tnat u wym kwah pynmih pyrtuid da ong u wa heipor wa wan sylli ki bru na Delhi da lai ki kut thaw ha Shilling wow kylli yei man i long ha ki chnong yong ki wei da kheiñ kyrdan katkam wa yoh yutip na ki paidbah.
Da ong u wa hajrong ini ka tnat pynroi sor da yarap ko ya kini ki bru wa wan na Delhi heipor wa lai ki cha ki skur heiwa ki khynnah wa em kamwa 5000 ngut da pynsñiaw ki yei chem yong ki hei yatoh wa i khooid i jngiar ha Shillong yeiwa da pyndap ha ki form wa da pynkhreh.
Katkam i pyntip uni u sahep hei sakhiat ka sor Shillong ymtoh kawa tngit bha na ki sor hapoh ka ri wei wow pynngat kyrdan ya ka Shillong hadooh 276 ym sñiaw yahap de, neibhah wa yeini i e kyrdan da leh lyngba ka u Facebook, WhatsApp, Instagram wa kiwi kiwi.
Da ong u wa ha u snem 2015, ka sor Shillong em ko ha ka kyrdan wa 53 napyrdi ki 100 tylli ki sorbah ha ka Ri, tangwa toh u sñiaw phylla heiwa da yoh won ko i kyrdan wa 276, neibhah wa katni won da bichaar du 500 tylli ki sor.
Katkam ka kyndon ka Smart City, wow yoh kyrdan ka sor toh wow pynbiang ya i rukom noh jhep pyllang jhep, ki sarok wa khooid, wa kiwi kiwi khamtam dooh toh wa ym em u lai paikhana khlemakor ki bru.
Em le tylli ki kyndon wa kongsan wow yoh yei naam wa khooid wei itæ toh wow yoh yutip lyngba ka Swachh Survekshan næ ka sylli wa leh da ki bor ka Municipal, wa ki yutip wa yoh ki na ki jubab ki paidbah kiwa chong chnong.
Discussion about this post