Neiliang ka BJP-Meghalaya ynne da pynche ko wa ym em u paan bor ko na ka sorkar jylla wow phah da ka CBI wow takit (Inquiry) hajrong i pynemkaam bakla ki Autonomous District Councils (ADC) ya ka poisa na ka sorkar pyrdi weiwa ka sorkar ymtoh i bor wa pait ya ki ADC wei emkaam ko wow tip ya u pood yong ka lada toh u takit ka CBI ha GHADC hajrong i pynemkaam bakla ya ka poisa na ka sorkar pyrdi.
Ka BJP da ong ko leh wa u Lakhmen Rymbui toh u tip u wa ka jylla ym em bor ko wow chah næ pyrchah ya i takit CBI heiyatoh wa ka poisa na ka sorkar pyrdi wei em leh i daw wa kongsan wow wan ka CBI neibhah wa ka GHADC ymtoh em ko hapoh ka sorkar jylla.
Da ong leh wa ka Meghalaya toh ka jylla kawa em hapoh ka Sixth Schedule kawa man ki jylla wa em ki bru ri-loom wei ka sorkaar jylla ym em bor ko hajrong kini ki jaitbru weiwa ki thaw ym em ki hapoh ki aiñ ka jylla (State Law) tangwa ka aiñ ki jaitbru ri-loom (Tribal law). Da kyntu ko leh wa ka sorkar ymtoh u yah bakla ko ya ki paidbah deiwa luchia ko ya ka CBI ha GHADC.
Chooh chooh da ong ko wa ki thaw ym em ki hapoh i pait ka sorkar jylla tangwa hapoh ki District Council katkaam ka riti synchaar ka ri katwa kamtæ ka sorkar jylla ymtoh u luchia ko yei takit ka CBI.
Ka BJP da kylli ko leh wa lada u Director of Local Fund Audit (DLFA) ye u wow puræ yukheiñ (Audit) ya ka poisa na ka sorkar pyrdi ya kawa da pynemkaam bakla? Ki Local Fund Audit ye ko mo wow Audit ya ka PLA 1 (Personal Ledger Account 1) kawa man ka muna poisa (Fund) ka GHADC.
