Ka sorkar pyrdi toh u pyrkhat ko wow thung VC ha NEHU da ki tre jylla: Ampareen

Ka Montri ka chnat i chait i khiah ka jylla, ka Dr. Mazel Ampareen Lyngdoh da ong ko wa ka sorkar pyrdi toh u pyrkhat noh ko wow thung da u/ka Vice Chancellor da kiwa na kani ka jylla kiwa sñiawthooh rap bha yei long i man hapoh ka skurbah North Eastern Hill University (NEHU).

Da ong ko wa man iwa emkaam ya ka sorkar pyrdi wow yasyllok leh wa ka sorkar jylla yei rukom thung kaam hapoh kani ka skurbah khamtam i thung ya u/ka Vice Chancellor.

“Da man sakhiat wa i thung kaam ym em man katkam ki kyndon wa da booh. Rap bha chiboon wow e laad ya ki tre jylla kiwa da biang kyrdan wow chimkti ha ka kyrdan ka wow e myntoi ya ka jylla. Ka sorkar pyrdi da booh ko ya ki skurbah ha boon ki jylla yow e myntoi ya ki, ym du wow e myntoi ya kitu kiwa yoh ya ka skurbah”, da ong ko.

Ka Ampareen da pynsñiaw ko leh yei kyrchaan yei yakhih kiwa lai puræ hanla ym pu em puræ bniah ko ya ki mat wa da dawa ki, deiwa pynrap leh wa kani ka yakhih yong ki toh hadien wa da chah wei suki hi-eh ki da ki bnai wa ki snem.

Related posts

Wa man Rangbah Shnong ki Garo, lai kdaw ka KHNAM ha ka KHADC wa man i pyrchah ya ka aiñ

November 26, 2024

Heipor tlang wa duna um ym ye u leh iyi iyi: Marcuise N Marak

November 26, 2024

“Ym yahaap wow tuklar O, tangwa nga ngiat ko wa ka NEHU toh ka wow e chakri kawa bha ya kiwa lai puræ, ymtoh wow lai lait na kiwa lai puræ hawa chim ki rai wa emkaam, lym kamtæ daw mih biang kam ini i eh i khoo”, da ong chooh chooh ko.

Ka Ampareen kawa man leh kawa e ktien yong ka sorkar MDA-II, da ong ko wa ka sorkar jylla ym ye ko wow tuklar ya ki kaam ha NEHU neidaw wa haap ko hapoh i pynlai ka sorkar pyrdi, tangwa ka sorkar jylla leh pait bha ko wa kam kawa e thaw wow booh ya ka NEHU heini, ka sorkar jylla toh kawa em hok wow e rai lang ha kiwa boon ki bynta kiwa ktah ya ka jylla.

“Deiwa ya syllok lang wei deiwa chim leh yei e yumut yong ka sorkar jylla daw pynlait na ka kynrum-kynram kamwa da mih katni, wei daw ye wow wanrah i myntoi ya ka skurbah hi waroh kawi”, da ong ka Ampareen.

Ka Montri da pynsñiaw ko yei kyrmen wa ka kynhun takit kawa da thung da ka sorkar pyrdi kawa da wan wow tih bniah ya iwa jia wa daw ye ko wow pynbait ya ki kynrum kynram ha NEHU, wei daw e ko ya ka Report kawa khlan wei kawa skem wow pynbait yeiwa eh ha kani ka skurbah.