U montri ka chnat i chait i khiah ka jylla, u Alexander Laloo Hek da ong u wa ki bor District ye ki wow leh ya kiwon kiwon ki kaam wow pynchlur ya ki paidbah wow chim ya i tika yada COVID-19.
Heiyatoh wa ka East Khasi Hills heiwa da booh kyndon deiwa ong wa kiwa chong dai khlem chim tika ym chah ya ki wow wai dukan ki nadooh ka 24 tarik, heiyatoh wa ini u Hek da ong u wa da kyrpaad ya ki paidbah wei i daw wa phah ya kiwa chongdai wow chim ki ya i tika toh wa yachem ki ya ki spah ngut ki bru katwa kamtæ emkaam wow yada ya ki wa ya kiwi tawon ki bru kamjooh pyn yaki leh wei i pynyoo ya ki Certificate wa dadep chim tika toh kam i dak wow pynchlur ya kiwi ki bru wow chim ki ya ini i tika.
Chooh chooh da ong u wa ha West Khasi Hills ki bor District leh da leh ki katkam wa chem wei yoobiang ki heiwa daw pynman ya ka khle nasib neibynta kiwa da chim ya i tika la ar sien wei kiwa jop u yoh ki T. 10,000.
U Hek da ong u leh wa ka sorkar da emkaam u pyrkhat yillu ko kammon wow pynchlur ya ki paidbah wow chim ya ini i tika.
Da ong u leh wa ki bor District da leh ki katwa ye wow pynchlur ya ki bru wei neiliang ka sorkar leh da ebor ko ha jar jiar ki District wow leh yeiwa emkaam wei ya ini ymtoh wa da rai da ki Deputy Commissioner tangwa da chim ya i rai ha ki Review Meeting leh kamjooh.
Heijooh i por da kdaw u leh wa kawi na ki laad toh wow kyntu ya ki heh niam heh balang wow leh ki yeiwa emkaam neiliang yong ki.
